നടൻ വിനായകന്റെ പോലീസ് സ്റ്റേഷനിലെ ‘പ്രകടനത്തെ’ അനുകൂലിച്ച് രംഗത്തെത്തിയവർക്കെതിരെ പ്രതികരണവുമായി നടൻ ഹരീഷ് പേരടി. ദിവസങ്ങൾക്ക് മുൻപ് പാനൂർ ചൊക്ലിയിൽ സനൂപ് എന്ന യുവാവിനെതിരെയുണ്ടായ പോലീസ് നടപടി ഓർമിപ്പിച്ചാണ് നടന്റെ ഫേസ്ബുക്ക് പോസ്റ്റ്. ഇപ്പോള്‍ വിനായകന് വേണ്ടി വാദിക്കുന്നവർ എന്തുകൊണ്ട് അന്ന് സനൂപിനെ പിന്തുണച്ച് എത്തിയില്ല എന്ന ചോദ്യമാണ് ഹരീഷ് പേരടി ഉയര്‍ത്തുന്നത്.
പാനൂർ ചൊക്ലിയിലെ സനൂപ് സിനിമ നടനല്ലെന്നും വെളുത്തിട്ടുമല്ലെന്നും അയാളുടെ ജാതി ആർക്കുമറിയില്ലെന്നും ഹരീഷ് ഫേസ്ബുക്കില്‍ കുറിച്ചു. പോലീസിന്റെ ഐഡി ചോദിച്ച സിനിമാ നടനൊടൊപ്പം നിൽക്കുന്ന എല്ലാ പുരോഗമന രോമങ്ങളും സനൂപിനെ കണ്ടില്ലെന്ന് നടിച്ചതായും ഹരീഷ് പേരടി കൂട്ടിച്ചേർത്തു.
ഫെയ്സ്ബുക്ക് പോസ്റ്റിന്റെ പൂര്‍ണ രൂപം:
പാനൂർ ചൊക്ലിയിലെ സനൂപ്..സിനിമാനടനല്ല …വെളുത്തിട്ടുമല്ല…അയാളുടെ ജാതി ആർക്കുമറിയില്ല…ഈ ഒക്ടോബര്‍ 10ന് അയാൾ പോലീസിനോട് ഒരു ചോദ്യം ചോദിച്ചു…സീറ്റ് ബെൽറ്റ് ഇടാതെ നിങ്ങൾ എങ്ങിനെയാണ് പോലീസ് വാഹനത്തിൽ യാത്ര ചെയ്യുന്നത് എന്ന്..പൊലീസ് കേസുമെടുത്തു… പോലീസിന്റെ ഐഡി ചോദിച്ച സിനിമാനടനൊടൊപ്പം നിൽക്കുന്ന എല്ലാ പുരോഗമന രോമങ്ങളും സനൂപിനെ കണ്ടില്ലെന്ന് നടിച്ചു.
അടുത്ത് ജൻമത്തിലെങ്കില്ലും ഒരു സിനിമാനടനാവണം എന്ന് കേരളത്തിലെ ചെറുപ്പക്കാർ ആഗ്രഹിച്ചാൽ അത് സംസ്ഥാന പുരസ്കാരം കിട്ടാൻ വേണ്ടിയല്ല…മറിച്ച് മനുഷ്യാവകാശത്തിനു വേണ്ടിയാണെന്ന് കരുതിയാൽ മതി…പ്രശ്നം സർക്കാറും പൊലീസ് നയവുമാണ്…എന്ന് നാടകക്കാരനായ സിനാമാനടൻ..ഹരീഷ് പേരടി …ജാഗ്രതൈ
