ബംഗ്ലാദേശിനെതിരെയുള്ള മത്സരത്തില്‍ പരിക്കേറ്റ് കളം വിടേണ്ടി വന്ന ഓള്‍ റൗണ്ടര്‍ ഹാര്‍ദിക്കിന്റെ ലോകകപ്പിലേക്കുള്ള തിരിച്ചുവരവ് ഇനിയും വൈകും. ആദ്യം ഇനിയുള്ള രണ്ടു മത്സരങ്ങളില്‍ മാത്രം കളിക്കില്ലെന്നായിരുന്നു അറിയിച്ചതെങ്കിലും നോക്കൗട്ട് അടക്കമുള്ള മത്സരങ്ങള്‍ താരത്തിന് നഷ്ടമാകുമെന്നാണ് പുറത്തുവരുന്ന വിവരം.
താരത്തിന് ഗ്രേഡ് 1 ലിഗമെന്റ് ഇഞ്ച്വറിയാണ് ഉണ്ടായിരിക്കുന്നത്. നിതിന്‍ പട്ടേലിന് കീഴിലുള്ള മെഡിക്കല്‍ സംഘമാണ് ദേശീയ ക്രിക്കറ്റ് അക്കാദമിയില്‍ താരത്തെ പരിശോധിക്കുന്നത്. വിചാരിച്ചതിലും ഗുരുതരമാണ് താരത്തിന്റെ പരിക്കെന്നാണ് വിവരം. ലിഗമെന്റിന് ചെറിയ പരിക്കാണെങ്കില്‍ പോലും രണ്ടാഴ്ച വിശ്രമം വേണ്ടിവരും. മെഡിക്കല്‍ സംഘം ടീം മാനേജ്‌മെന്റുമായി നിരന്തരം ബന്ധപ്പെടുന്നുണ്ട്. താരത്തിന് പകരം ആരെയും ടീമില്‍ ഉള്‍പ്പെടുത്തേണ്ടെന്നാണ് ടീമിന്റെ ഇപ്പോഴത്തെ നിലപാട്.
ഇനി ഹാര്‍ദിക് കളത്തിലിറങ്ങാന്‍ നിര്‍ബന്ധിതനായാല്‍ ഇഞ്ചക്ഷന്‍ അടക്കമുള്ള കാര്യങ്ങള്‍ വേണ്ടിവരും. താരം ഇതുവരെയും ബൗളിംഗ് ആരംഭിച്ചിട്ടില്ല. താരത്തിനായി കാത്തിരിക്കാന്‍ തന്നെയാണ് ടീമിന്റെ തീരുമാനവും. ഇനി ഇത് നടന്നില്ലെങ്കില്‍ സ്‌ക്വാഡില്‍ നിന്ന് പുറത്തായ അക്‌സര്‍ പട്ടേലിനെ സ്റ്റാന്‍ഡ് ബൈ ആയി ടീമില്‍ ഉള്‍പ്പെടുത്തിയേക്കും. സയ്യിദ് മുഷ്താഖ് അലി ട്രോഫിയില്‍ താരം 27 പന്തില്‍ 50 അടിച്ച് ഫോം തെളിയിച്ചിരുന്നു.
