ആൺസുഹൃത്തുമായി ഒരുമിച്ച് താമസിക്കുന്നത് ഭർത്താവ് അറിഞ്ഞു; മലയാളി യുവാവും യുവതിയും ബെംഗളൂരുവിൽ തീകൊളുത്തി മരിച്ചു

ബെംഗളൂരു: മലയാളി യുവാവും ബംഗാളി യുവതിയും ഫ്ലാറ്റിൽ തീ കൊളുത്തി മരിച്ച നിലയിൽ. ബെംഗളൂരുവിലെ ദൊഡ്ഡഗുബിയിലാണ് സംഭവം. ഇടുക്കി സ്വദേശിയായ അബിൽ അബ്രഹാം (29), പശ്ചിമ ബംഗാൾ സ്വദേശിനി സൗമനി ദാസ് (20) എന്നിവരെയാണ് ആത്മഹത്യ ചെയ്ത നിലയിൽ കണ്ടെത്തിയത്.

നഴ്‌സിംഗ് സർവ്വീസ് ഏജൻസി നടത്തിയിരുന്ന അബിൽ കുറച്ചു കാലം മുമ്പാണ് ബെംഗളൂരുവിൽ നഴ്‌സിംഗ് പഠിച്ചിരുന്ന വിവാഹിതയായ സൗമനിയുമായി അടുത്തത്. തുടർന്ന് ഇരുവരും ഒരുമിച്ച് താമസിക്കാനും ആരംഭിച്ചിരുന്നു. ഇക്കാര്യം യുവതിയുടെ ഭർത്താവ് അറിഞ്ഞതോടെയാണ് ഇരുവരും ജീവനൊടുക്കിയത്.

പെട്രോൾ ഒഴിച്ച് തീകൊളുത്തിയതിന് പിന്നാലെ ഇരുവരുടെയും നിലവിളി കേട്ട് സമീപവാസികൾ ഓടിയെത്തിയിരുന്നു. എന്നാൽ യുവതി സംഭവസ്ഥലത്ത് വച്ച് തന്നെ മരിച്ചു. ചികിത്സയ്‌ക്കിടെയാണ് യുവാവിന് ജീവൻ നഷ്ടമായത്. സംഭവത്തിൽ പോലീസ് അസ്വാഭാവിക മരണത്തിന് കേസെടുത്തു.