ന്യൂഡൽഹി: നാഷണൽ ഹെറാൾഡ് കേസുമായി ബന്ധപ്പെട്ട് കോൺഗ്രസ് നേതാക്കളായ സോണിയയെയും രാഹുലിനെയും എൻഫോഴ്സ്‌മെന്റ് ഡയറക്ടറേറ്റ് വീണ്ടും ചോദ്യം ചെയ്യും. കോടതിയിൽ കേസിന്റെ കുറ്റപത്രം സമർപ്പിക്കുന്നതിന് മുന്നോടിയായി ചോദ്യം ചെയ്യാനാണ് ഇഡിയുടെ നീക്കം. ഇരുവർക്കും ഇഡി പുതിയ സമൻസ് അയച്ചേക്കും.
കേസിൽ കഴിഞ്ഞ രണ്ടുദിവസമായി കോൺഗ്രസ് മുൻ ട്രഷറർ പവൻ ബൻസലിനെ ഇഡി ചോദ്യം ചെയ്തുവരികയാണ്. ഡൽഹിയിലെ നാഷണൽ ഹെറാൾഡ് ഓഫീസിൽ ഉൾപ്പടെ നടത്തിയ റെയ്ഡുകളിൽ ലഭിച്ച രേഖകളുടെയും തെളിവുകളുടെയും അടിസ്ഥാനത്തിലാണ് ബൻസാലിനെ ഇഡി ചോദ്യം ചെയ്യുന്നത്.
2022ൽ സോണിയ, രാഹുൽ, കോൺഗ്രസ് അദ്ധ്യക്ഷൻ മല്ലികാർജുൻ ഖാർഗെ, പവൻ ബൻസൽ തുടങ്ങിയവരെ ഇഡി ഒന്നിലധികം തവണ ചോദ്യം ചെയ്തിരുന്നു. സോണിയയെ മൂന്ന് ദിവസവും രാഹുലിനെ അഞ്ച് ദിവസവുമാണ് ചോദ്യം ചെയ്തത്. എന്നാൽ കോടികളുടെ വെട്ടിപ്പ് നടന്ന കേസുമായി ബന്ധപ്പെട്ട് തങ്ങൾക്ക് ഒന്നും അറിയില്ലെന്നാണ് ഇരുവരും ഇഡിയെ അറിയിച്ചത്.
സോണിയ, രാഹുൽ, ഓസ്‌കാർ ഫെർണാണ്ടസ്, അന്തരിച്ച മോത്തിലാൽ വോറ, സാം പിട്രോഡ എന്നിവർക്ക് എതിരെ 2012-ലാണ് സുബ്രഹ്‌മണ്യം സ്വാമി നാഷണൽ ഹെറാൾഡ് കേസ് ഫയൽ ചെയ്തത്. വെറും 50 ലക്ഷം മാത്രം നൽകി രാഹുലിനും സോണിയയ്‌ക്കും ഉടമസ്ഥാവകാശമുള്ള യംഗ് ഇന്ത്യ വഴി 90.25 കോടി ആസ്തിയുള്ള, കോൺഗ്രസ് ഉടമസ്ഥതയിലുള്ള അസോസിയേറ്റഡ് ജേണൽസ് ലിമിറ്റഡിനെ ഏറ്റെടുത്തു എന്നായിരുന്നു ഇവർക്കെതിരെ ഉയർന്ന ആരോപണം.
