ന്യൂഡൽഹി: ഭൂട്ടാൻ രാജാവ് ജിഗ്മേ ഖേസർ നാംഗ്യേൽ വാങ്ചുക്കുമായി കൂടിക്കാഴ്ച നടത്തി മഹീന്ദ്രഗ്രൂപ്പ് ചെയർമാൻ ആനന്ദ് മഹീന്ദ്ര. ഇന്ത്യ-ഭൂട്ടാൻ നയതന്ത്ര വിഷയങ്ങൾ ചർച്ച ചെയ്യാനായി ഭാരതത്തിൽ ഒരാഴ്ചത്തെ സന്ദർശനത്തിനായി എത്തിയതായിരുന്നു വാങ്ചുക്ക്. രാജ്യത്തോടുള്ള രാജാവിന്റെ വ്യക്തമായ കാഴ്ചപ്പാടിനെ പ്രകീർത്തിച്ച് അദ്ദേഹത്തോടൊപ്പമുള്ള ചിത്രങ്ങളും ആനന്ദ് മഹീന്ദ്ര സമൂഹമാദ്ധ്യമത്തിൽ പങ്കുവച്ചു. ‘ ഊർജ്ജസ്വലത’ എന്ന അടിക്കുറിപ്പോടെയാണ് ആനന്ദ് മഹീന്ദ്ര ചിത്രങ്ങൾ പങ്കുവച്ചിരിക്കുന്നത്.
” ഇന്നലെ ഭൂട്ടാൻ രാജാവ് ജിഗ്മേ ഖേസർ നാംഗ്യേൽ വാങ്ചുക്കുമായുള്ള കൂടിക്കാഴ്ച എനിക്ക് വളരെ ഊർജ്ജം പകരുന്നതായിരുന്നു. വളരെ ചെറുപ്പത്തിൽ തന്നെ അദ്ദേഹം വലിയൊരു അനുഭവസമ്പത്താണ് നേടിയിരിക്കുന്നത്. ഇതിനുപുറമെ ഭൂട്ടാനെ കുറിച്ച് ലാളിത്യം നിറഞ്ഞതും എന്നാൽ ശക്തവുമായ കാഴ്ചപ്പാടാണ് അദ്ദേഹത്തിനുള്ളത്. നമ്മുടെ ഭാരതത്തോടുള്ള അദ്ദേഹത്തിന്റെ ആദരവും അടുപ്പവും എനിക്ക് കാണാൻ സാധിച്ചു. അദ്ദേഹത്തിന്റെ സ്വപ്നങ്ങളും കാഴ്ചപ്പാടുകളും യാഥാർത്ഥ്യമാക്കുന്നതിൽ പങ്കാളിയാകാനുള്ള അവസരം ഇന്ത്യ നഷ്ടപ്പെടുത്തരുത്.”- ആനന്ദ് മഹീന്ദ്ര കുറിച്ചു.
ഒരാഴ്ചത്തെ സന്ദർശനത്തിനായി ഭാരതത്തിലെത്തിയ ഭൂട്ടാൻ രാജാവ് കഴിഞ്ഞ ദിവസം പ്രധാനമന്ത്രി നരേന്ദ്രമോദിയുമായും കൂടിക്കാഴ്ച നടത്തിയിരുന്നു. ഊർജ്ജം, ആരോഗ്യം, വിദ്യാഭ്യാസം, അടിസ്ഥാന സൗകര്യ വികസനം, ബഹിരാകാശ മേഖലകളിൽ സഹകരണം വർദ്ധിപ്പിക്കുന്നത് തുടങ്ങിയവ സംബന്ധിച്ചുള്ള കാര്യങ്ങളാണ് കൂടിക്കാഴ്ചയിൽ ചർച്ച ചെയ്തിരിക്കുന്നത്.