കൊച്ചു കൊച്ചു സന്തോഷങ്ങൾ, എന്റെ വീട് അപ്പൂന്റേം എന്നീ ചിത്രങ്ങളിലൂടെ മലയാളികൾക്ക് ഏറെ പ്രിയപ്പെട്ട താരമാണ് കാളിദാസ് ജയറാം. ബാലതാരമായി രണ്ട് സിനിമകളിൽ മാത്രമേ കാളിദാസ് അഭിനയിച്ചിട്ടുള്ളൂവെങ്കിലും മലയാളികൾക്ക് അത് ഇന്നും പ്രിയപ്പെട്ടവയാണ്. ‘എന്റെ വീട് അപ്പൂന്റേം’ എന്ന സിനിമയിലെ അഭിനയത്തിന് മികച്ച ബാലതാരത്തിനുള്ള ദേശീയ ചലച്ചിത്ര പുരസ്‌കാരം കാളിദാസിന് ലഭിച്ചിരുന്നു. ഇന്നിതാ വിക്രം സിനിമയെ കുറിച്ചും സാവിധായകൻ ലോകേഷ് കനകരാജിനെ കുറിച്ചും പങ്കുവെക്കുകയാണ് കാളിദാസ് ജയറാം.
‘വിക്രം എന്ന സിനിമയിൽ അഭിനയിക്കുമ്പോൾ സിനിമയെ കുറിച്ച് ഒരു ഐഡിയയും ഇല്ലായിരുന്നു. സംവിധായകൻ എന്ന നിലയിൽ ലോകേഷ് സർ വളരെ സിമ്പിളാണ്. ലോകേഷ് സാർ ഇടയ്‌ക്ക് വന്നിട്ട് അത് ചെയ്യ് ഇത് ചെയ്യ് എന്നൊക്കെ പറയും. അത്രയേ ഉള്ളു. അതിനപ്പുറത്തേക്ക് എന്താണെന്ന് എനിക്കറിയില്ല. നമ്മൾ വലുതായൊന്നും കഷ്ടപ്പെടേണ്ട ആവശ്യമില്ല. എല്ലാ പണിയും അദ്ദേഹം തന്നെ ചെയ്‌തോളും. ലോകേഷ് സാർ എന്ത് പറയുന്നോ അത് അതുപോലെ ചെയ്താൽ മാത്രം മതി’.
ഈ സിനിമയിൽ ആകെ രണ്ട് മൂന്ന് സീൻ മാത്രമേയുള്ളൂ. ചിലപ്പോൾ എഡിറ്റ് ചെയ്യുമ്പോൾ അത് ഒഴിവാക്കുമെന്നാണ് ഷൂട്ടിംഗ് കഴിഞ്ഞ് വന്നപ്പോൾ ഞാൻ സുഹൃത്തുക്കളോട് പറഞ്ഞത്. എന്നാൽ ആദ്യ ദിവസം തന്നെ തിയേറ്ററിൽ സിനിമ കണ്ടപ്പോൾ ശരിക്കും ഞാൻ അത്ഭുതപ്പെട്ടു. കമൽ സാറുമായുള്ള സീനിലേക്ക് വരുമ്പോഴാണ് കഥയിൽ ഇങ്ങനെയൊരു കാര്യം ഒളിഞ്ഞിരിക്കുന്നുണ്ടെന്ന് എനിക്ക് മനസിലായത്. ആ സമയത്ത് ലോകേഷ് സാർ എന്നോട് പറഞ്ഞത്, കണ്ണൊന്ന് ചെറുതായിട്ട് നനഞ്ഞിരിക്കണം അദ്ദേഹത്തെ കാണുമ്പോൾ ഒരു കാര്യം കമ്മ്യൂണിക്കേറ്റ് ചെയ്യണമെന്നായിരുന്നു. അത് മാത്രമേ പറഞ്ഞിട്ടുള്ളൂവെന്നും കാളിദാസ് പറഞ്ഞു.
