ശാരീരിക ആരോഗ്യം പോലെ ഒരു മനുഷ്യന് ഏറ്റവും അത്യാവശ്യമായ ഒന്നാണ് മാനസികാരോഗ്യം. സ്വാഭാവികമായി മാനസിക നില ശരിയല്ലാത്തവരിൽ കാണുന്നത് അകാരണമായി പെട്ടെന്ന് ദേഷ്യപ്പെടുക, അനാവശ്യമായി സംസാരിക്കുക എന്നിങ്ങനെയുള്ള ലക്ഷണങ്ങളാണ്. മറ്റുള്ളവരിൽ നിന്നും മാറി നിൽക്കുക, ഒറ്റപ്പെട്ടിരിക്കാൻ ശ്രമിക്കുക എന്നതും മാനസിക നില തകർന്നതിന്റെ ലക്ഷണമാണ്. മാനസികാരോഗ്യം കുറഞ്ഞ് തുടങ്ങിയാൽ സന്തോഷം എന്ന അവസ്ഥ തന്നെ ഇല്ലാതായി തുടങ്ങും.
മാനസികാരോഗ്യം വർദ്ധിപ്പിക്കുന്നതിനായി ശ്രദ്ധിക്കേണ്ട ഏറ്റവും പ്രധാനപ്പെട്ട കാര്യങ്ങളിൽ ഒന്നാണ് ശരീരത്തിന് ആവശ്യമായ പോഷകങ്ങള്‍. ഇതില്‍ പ്രധാനപ്പെട്ടതാണ് സണ്‍ഷൈന്‍ വിറ്റാമിന്‍ എന്നറിയപ്പെടുന്ന വിറ്റാമിന്‍ ഡി. ഇത് തലച്ചോറിലെ ഹാപ്പി ഹോര്‍മോണിന്റെ ഉത്പാദനം വർദ്ധിപ്പിക്കുന്നു. ഇത് മാനസികാവസ്ഥ മെച്ചപ്പെടുത്തുകയും ഡിപ്രഷന്‍ വരുന്നത് തടയുകയും ചെയ്യും. വിറ്റാമിന്‍ ഡി പ്രധാനമായും സൂര്യപ്രകാശത്തില്‍ നിന്നാണ് ലഭിക്കുന്നത്.
ഇത് കൂടാതെ, പാലുല്പന്നങ്ങളിൽ നിന്നും വിറ്റാമിൻ ഡി ലഭിക്കും. സൂര്യപ്രകാശത്തിനു ശേഷം വൈറ്റമിൻ ഡിയുടെ കുറവ് ഇല്ലാതാക്കാൻ ഏറ്റവും നല്ല സ്രോതസാണ് മത്സ്യം. വിറ്റാമിൻ ഡി പല മത്സ്യങ്ങളിലും വലിയ അളവിൽ കാണപ്പെടുന്നുണ്ട്. നമ്മുടെ നാട്ടിൽ സുലഭമായി ലഭിക്കുന്ന അയല, മത്തി, ചാള, നെത്തോലി തുടങ്ങിയ മത്സ്യങ്ങളിലും വൈറ്റമിൻ ഡി അടങ്ങിയിട്ടുണ്ട്. കൂടാതെ സാൽമൺ ഫിഷിലും ധാരാളം വിറ്റാമിൻ ഡി അടങ്ങിയിട്ടുണ്ട്.
