മരക്കാന: അർജന്റീനയുടെ സ്വപ്‌ന നേട്ടങ്ങൾക്ക് പിന്നിലെ ചാണക്യ തന്ത്രൻ സ്ഥാനമൊഴിയുന്നു. അർജന്റീനയുടെ പരിശീലക സ്ഥാനം ഒഴിയാൻ ആഗ്രഹിക്കുന്നുവെന്ന സൂചന നൽകി ലിയോണൽ സ്‌കലോണി. ഇന്ന് ബ്രസീലിനെതിരെ നടന്ന ലോകകപ്പ് യോഗ്യത മത്സരത്തിന് ശേഷമാണ് സ്‌കലോണി മാദ്ധ്യമങ്ങളോട് ഇക്കാര്യം വ്യക്തമാക്കിയത്. 36 വർഷങ്ങൾക്ക് ശേഷം ഖത്തറിൽ മെസ്സിക്കും സംഘത്തിനും ലോകകിരീടം സമ്മാനിച്ച പരിശീലകനാണ് സ്‌കലോണി. അതിനുമുമ്പ് കോപ്പ അമേരിക്ക കിരീടവും ഫൈനലിസിമയും സ്‌കലോണിയുടെ കീഴിൽ അർജന്റീന സ്വന്തമാക്കിയിരുന്നു.
അർജന്റീനയ്ക്ക് എല്ലാം സാധ്യമായ ശക്തനായ ഒരു പരിശീലകനെ ആവശ്യമുണ്ട്. ടീമിന്റെ ഭാഗമായ താരങ്ങൾ പരിശീലകനെന്ന നിലയിൽ വലിയ പിന്തുണയാണ് നൽകിയത്. ഭാവിയിൽ താൻ എന്തുചെയ്യാൻ പോകുന്നു എന്നതിനെ കുറിച്ച് ചിന്തിക്കേണ്ടതുണ്ടെന്ന് സ്‌കലോണി മാദ്ധ്യമപ്രവർത്തകരോട് വ്യക്തമാക്കി. ടീമിന്റെ നിലവാരം എപ്പോഴും ഉയർന്ന് നിൽക്കണമെന്നും ഇതൊരു വിടവാങ്ങൽ പ്രസംഗമായി കണേണ്ടതില്ലെന്നും സ്‌കലോണി പറഞ്ഞു. ഇതേപറ്റി അർജന്റെയ്ൻ ഫുട്‌ബോൾ പ്രസിഡന്റുമായും താരങ്ങളുമായും പിന്നീട് സംസാരിക്കുമെന്നും സ്‌കലോണി വ്യക്തമാക്കി.
