ഡെറാഡൂൺ: സിൽക്യാര ദൗത്യം 17-ാം ദിവസത്തിലേക്ക് കടക്കുന്നു. കുടുങ്ങിക്കിടക്കുന്ന 41 തൊഴിലാളികളെ പുറത്തെത്തിക്കാനുള്ള തീവ്ര ശ്രമം ഇപ്പോഴും തുടരുകയാണ്. ഏകദേശം 50 മീറ്ററിലധികം കുഴിച്ചുകഴിഞ്ഞെന്നും വെറും 5 മീറ്റർ അകലെയാണ് കുടുങ്ങിക്കിടക്കുന്നവർ ഉള്ളതെന്നുമാണ് അധികൃതർ അറിയിക്കുന്നത്. ഉത്തരാഖണ്ഡ് മുഖ്യമന്ത്രി പുഷ്‌കർ സിംഗ് ധാമി സ്ഥലത്തെത്തിയിട്ടുണ്ട്.
ഡ്രില്ലിംഗ് നടത്തുന്നതിന് പലപ്പോഴായി തടസങ്ങൾ നേരിട്ടിരുന്നെങ്കിലും കഴിഞ്ഞ രാത്രി പ്രതിസന്ധികൾ കൂടാതെ ദൗത്യം പുരോഗമിച്ചതായി അധികൃതർ അറിയിച്ചു. ആകെ 57 മീറ്റർ കുഴിക്കുകയാണ് ദൗത്യ സംഘത്തിന്റെ ലക്ഷ്യം. തുടർന്ന് ഇതിലൂടെ പൈപ്പ് കടത്തിവിട്ട് കുടുങ്ങിക്കിടക്കുന്നവർക്ക് അരികിലെത്താനുള്ള നീക്കമാണ് പുരോഗമിക്കുന്നത്. നിലവിൽ 51.5 മീറ്ററുകൾ കുഴിച്ചുകഴിഞ്ഞു. 5-6 മീറ്റർ ദൂരത്തോളം മാത്രമേ ഇനി ഡ്രില്ലിംഗ് ചെയ്യേണ്ടതുള്ളൂ. ഇതുവരെയുള്ള നടപടികൾ രക്ഷാദൗത്യത്തിന് അനുകൂലമാണെന്നും അധികൃതർ അറിയിച്ചു.
നേരത്തെ 47 മീറ്ററോളം ദൂരം വിജയകരമായി കുഴിച്ചെടുത്തിരുന്നു. ഇതിനിടെയാണ് ഡ്രില്ലിംഗ് നടത്തുന്ന ഓഗർ മെഷീൻ അവശിഷ്ടങ്ങൾക്കിടയിൽ കുടുങ്ങിയത്. തുടർന്ന് പ്ലാസ്മ കട്ടർ ഉപയോഗിച്ച് മെഷീൻ മുറിച്ചുമാറ്റേണ്ടി വന്നു. ഇതായിരുന്നു ദൗത്യം വീണ്ടും വൈകാൻ കാരണമായത്. മുകളിൽ നിന്ന് താഴോട്ട് കുത്തനെയുള്ള കുഴിക്കലാണ് നിലവിൽ തുടരുന്നത്.
