ഉപ്പ് ചേർത്ത് ആഹാരം കഴിക്കാനാണ് ഭൂരിഭാഗം ആളുകൾക്കും ഇഷ്ടം. പാചക വേളയിൽ ഉപ്പ് ചേർത്തതിന് ശേഷം ആഹാരം കഴിക്കാൻ നേരത്ത് വീണ്ടും ഉപ്പ് ചേർക്കുന്നവരും ഇക്കൂട്ടത്തിലുണ്ട്. ഉപ്പിനോടുള്ള ഈ ആസക്തി ചിലപ്പോൾ വിനയായേക്കാം. പഞ്ചസാര മാത്രമല്ല ഉപ്പും പ്രമേഹത്തിന് കാരണമാകുമെന്നാണ് പല പഠനങ്ങളും പറയുന്നത്. ഉപ്പിന്റെ അമിതോപയോഗം ടൈപ്പ് 2 പ്രമേഹ സാധ്യത വർദ്ധിപ്പിക്കുമെന്നും ആരോഗ്യവിദഗ്ധർ ചൂണ്ടിക്കാട്ടുന്നു
ഉപ്പ് ചേർക്കുന്നത് ഭക്ഷണം കഴിക്കാൻ കൂടുതൽ പ്രേരിപ്പിക്കുന്നതോടെ ഇത് അമിതവണ്ണത്തിലേക്ക് നയിക്കുന്നു. ഇതുവഴി പ്രമേഹ സാധ്യത വർദ്ധിക്കുമെന്നാണ് ഗവേഷകർ പറയുന്നത്. മിതമായ രീതിയിൽ ഉപ്പ് കഴിക്കുന്നവരെക്കാൾ ദിവസേന ഭക്ഷണത്തിൽ ഉപ്പ് ഉപയോഗിക്കുന്നവരിലാണ് ടൈപ്പ് 2 പ്രമേഹ സാധ്യത കൂടുതൽ.
സോഡിയം കൂടുതലായി അടങ്ങിയിട്ടുള്ള ഭക്ഷണങ്ങൾ ഒഴിവാക്കുകയാണ് പ്രമേഹ സാധ്യത കുറയ്ക്കാനുള്ള ആദ്യ വഴി. ദിവസേന കഴിക്കുന്ന പല ഭക്ഷണങ്ങളിലും ഉപ്പിന്റെ അളവ് കുടുതലായി ഉൾപ്പെട്ടിട്ടുണ്ട്. ആദ്യം അവ നിയന്ത്രിക്കണം. ടിന്നിലടച്ച ഭക്ഷണങ്ങൾ, ബിസ്ക്കറ്റ്, ബ്രഡ്, എന്നിവയെല്ലാം അതിൽ ഉൾപ്പെടുന്നു. ഇവയുടെ ഉപയോഗം കുറയ്ക്കുന്നത് വഴി ടൈപ്പ് 2 പ്രമേഹ സാധ്യത നിയന്ത്രിക്കാം.
