കൊല്ലം: ആറുവയസുകാരിയെ തട്ടിക്കൊണ്ടുപോയ കേസിൽ കൂടുതൽ വിവരങ്ങൾ പുറത്ത്. കുട്ടിയെ കൊണ്ടുപോയ ഓട്ടോയുടെ വിവരങ്ങൾ പോലീസ് പങ്കുവെച്ചു. കൊല്ലം രജിസ്ട്രേഷനാണ് ഓട്ടോയ്‌ക്കുള്ളത്. ഓട്ടോയുടെ മുന്നിൽ ചുവന്ന പെയിന്റിംഗും ഗ്ലാസിൽ എഴുത്തുമുണ്ട്. വാഹനത്തെ കുറിച്ച് വിവരം ലഭിക്കുന്നവർ അറിയിക്കണമെന്ന് പോലീസ് അഭ്യർത്ഥിച്ചിട്ടുണ്ട്. കേസുമായി ബന്ധപ്പെട്ട് ചിറക്കര സ്വദേശിയെ കസ്റ്റഡിയിലെടുത്തിട്ടുണ്ട്.
കൊല്ലം ഓയൂരിൽ നിന്ന് കുട്ടിയെ തട്ടിക്കൊണ്ടുപോയതിന് പിന്നിൽ വൻ ഗൂഢാലോചന നടന്നിട്ടുണ്ടെന്ന് വ്യക്തമാണ്. കുട്ടിയുമായി ആദ്യം കാറിലും പിന്നീട് സംഘം ഓട്ടോയിലുമാണ് സഞ്ചരിച്ചത്. കാറിന് ഒന്നിലധികം വ്യാജ നമ്പറുകൾ ഉണ്ടെന്നും ഒരേ റൂട്ടിൽ പല നമ്പർ പ്ലേറ്റുകൾ വച്ച് ഓടിച്ചതായും പോലീസ് കണ്ടെത്തി. കാർ വാടകയ്‌ക്ക് കൊടുത്തതെന്നാണ് പോലീസ് സംശയിക്കുന്നത്. ചിറയ്ക്കൽ, ചാത്തനൂർ ഭാഗത്താണ് കുട്ടിയെ തട്ടിക്കൊണ്ടുപോയതിന് ശേഷം വാഹനം പല പ്രാവശ്യമായി കറങ്ങിയിരിക്കുന്നത്.
ആദ്യം കിട്ടിയ നമ്പർ പ്ലേറ്റ് മലപ്പുറം സ്വദേശിയുടേതായിരുന്നു. പിന്നീട് വെള്ള സ്വിഫിറ്റ് കാറാണ് സിസിടിവിയിൽ പതിഞ്ഞത്. ഇതിന്റെ നമ്പർ വേറെയായിരുന്നു. ആദ്യം പോലീസ് ഇത് കണക്കാക്കിയില്ലെങ്കിലും പിന്നീട് നടത്തിയ പരിശോധനയിലാണ് ഈ കാർ തന്നെയാണ് പല നമ്പറുമായി ദേശീയപാതയിലൂടെ സഹിതം പോയത്. ഒന്നിലധികം നമ്പർ ഉപയോഗിച്ച് അന്വേഷണ ഉദ്യോഗസ്ഥരുടെ ശ്രദ്ധ തിരിക്കുകയായിരുന്നു പ്രതികളുടെ ലക്ഷ്യം. പിന്നീടുള്ള യാത്രയ്‌ക്ക് പ്രതികൾ ഓട്ടോയാണ് ഉപയോഗിച്ചത്. കൊല്ലം രജിസ്ട്രേഷനാണ് ഇതിനുള്ളതെന്ന് സ്ഥിരീകരിച്ചു.
കുട്ടിയെ തട്ടിക്കൊണ്ട് പോയ ശേഷം ഒരു സ്ത്രീ പുറത്ത് പോയി ഭക്ഷണം വാങ്ങിയെന്നും വാഹനത്തിൽ രണ്ട് സ്ത്രീകളും രണ്ട് പുരുഷന്മാരുമാണ് ഉണ്ടായിരുന്നതെന്നും കുട്ടി മൊഴി നൽകി. പ്രതികൾ തമ്മിൽ സംസാരം കുറവായിരുന്നുവെന്നും കുട്ടി പറഞ്ഞു. കുട്ടിയെ തിരികെ കൊണ്ടു വിടുമ്പോഴും മൂന്ന് പേർ സംഘം വാഹനത്തിൽ ഉണ്ടായിരുന്നു. കൊല്ലം മജിസ്ട്രേറ്റിന് മുൻപാകെയാണ് കുട്ടിയുടെ മൊഴി രേഖപ്പെടുത്തിയത്. കൊല്ലം വിക്ടോറിയ ആശുപത്രിയിൽ കഴിഞ്ഞിരുന്ന കുട്ടി ഇന്നലെ ആശുപത്രി വിട്ടു. ഇന്ന് കുട്ടിയുടെ പിതാവിനെ ചോദ്യം ചെയ്യാൻ പോലീസ് വിളിപ്പിച്ചിട്ടുണ്ട്.
