എറണാകുളം: തോട്ടത്തിൽ പൊട്ടി വീണ ലൈൻ കമ്പിയിൽ നിന്ന് ഷോക്കേറ്റ് ഇതര സംസ്ഥാന തൊഴിലാളിയുടെ മകന് ദാരുണാന്ത്യം. മൂവാറ്റുപുഴയിലെ പേഴക്കാപ്പള്ളിയിലാണ് സംഭവം. 11 വയസുള്ള റാബുൽ ഹുസൈനാണ് മരിച്ചത്. ആക്രി സാധനങ്ങൾ ശേഖരിക്കുന്നതിനിടെ ഇന്ന് രാവിലെ 11.30-ഓടെയായിരുന്നു അപകടം.
പേഴക്കാപ്പള്ളിയിലെ ഒരു ജാതി തോട്ടത്തിൽ ആക്രി പെറുക്കുന്നതിനിടെ കമ്പി കിടക്കുന്നത് കണ്ട് കുട്ടി കയറിപിടിക്കുകയായിരുന്നു. ഉപയോഗ ശൂന്യമായ കമ്പിയാണെന്നാണ് 11-കാരൻ തെറ്റിദ്ധരിച്ചത്. ഇതോടെ ഷോക്കേൽക്കുകയായിരുന്നു. റാബുലിന്റെ ഒപ്പമുണ്ടായിരുന്ന സഹോദരനും പൊള്ളലേറ്റിട്ടുണ്ട്. ഇരുവരെയും ഉടൻ തന്നെ തൊട്ടടുത്തുള്ള ആശുപത്രിയിലെത്തിച്ചെങ്കിലും 11-കാരന്റെ ജീവൻ രക്ഷിക്കാനായില്ല. സഹോദരൻ അപകടനില തരണം ചെയ്തതായി ആശുപത്രി അധികൃതർ അറിയിച്ചു. വൈദ്യുതക്കമ്പി പൊട്ടിവീണത് അറിഞ്ഞില്ലെന്നാണ് കെഎസ്ഇബി ഉദ്യോഗസ്ഥരുടെ വാദം. സംഭവത്തിൽ അന്വേഷണം ആരംഭിച്ചിട്ടുണ്ട്.
