കാലാവസ്ഥാമാറ്റങ്ങൾ പലപ്പോഴും നമ്മളെ ബാധിക്കാറുണ്ട്. ചൂടിൽ നിന്നും തണുപ്പിലേക്കും, തിരിച്ചും കാലാവസ്ഥ മാറികൊണ്ടിരിക്കുകയാണ്. അലർജി, ചർമ്മ രോഗങ്ങൾ എന്നിവയെല്ലാം നമ്മെ അലട്ടുന്ന പ്രശ്‌നങ്ങളാണ്. എന്നാൽ ഏറ്റവും അധികം ചർമ്മത്തെയാണ് ഈ കാലാവസ്ഥാമാറ്റം ബാധിക്കുന്നത്. ചർമ്മം സംരക്ഷിക്കുന്നതിനുള്ള ഏറ്റവും മികച്ച മാർഗം ഭക്ഷണ ക്രമീകരണമാണ്.
ശരീരത്തിൽ ജലാംശം നിലർത്തുക എന്നതാണ് ഏറ്റവും ആദ്യം ചെയ്യേണ്ട കാര്യം. ജലാംശം നിലനിർത്താനുള്ള ഏറ്റവും നല്ല മാർഗം ധാരാളം വെള്ളം കുടിക്കുക എന്നതാണ്. ഒരു ദിവസം കുറഞ്ഞത് 2 ലിറ്റർ വെള്ളമെങ്കിലും കുടിക്കണം. കൂടാതെ പാനീയങ്ങളോ നാരങ്ങ വെള്ളമോ പഴച്ചാറുകളോ ഭക്ഷണത്തിൽ ഉൾപ്പെടുത്താം. അടുത്തതായി വിറ്റാമിൻ സി അടങ്ങിയ ഭക്ഷണങ്ങൾ കഴിക്കുക എന്നതാണ്. ഇവ ആന്റിഓക്സിഡന്റുകൾ പ്രധാനം ചെയും. പ്രതിരോധശേഷി വർദ്ധിപ്പിക്കുകയും ശരീരത്തിൽ നിന്ന് വിഷവസ്തുക്കളെ പുറന്തള്ളുകയും ചെയ്യുന്നത് വഴി ചർമ്മത്തെ കൂടുതൽ സംരക്ഷിക്കാം.
ഭക്ഷണത്തിൽ സ്ഥിരമായി ഉപയോഗിക്കാവുന്ന ഒന്നാണ് ബീറ്റ്‌റൂട്ട്. ഇതിൽ ഉൾപ്പെട്ടിട്ടുള്ള വിറ്റാമിനുകളും ധാതുക്കളും ചർമ്മത്തെ മൃദുലമാക്കാൻ സഹായിക്കും. കൂടാതെ കാലാവസ്ഥ മാറ്റം കൊണ്ട് ഉണ്ടാകുന്ന ചർമ്മ പ്രശ്‌നങ്ങൾക്കും പരിഹാരമാണ്. ഡ്രൈ ഫ്രൂട്ട്‌സ്, നട്‌സ് എന്നിവയിൽ ധാരാളം പോഷകങ്ങൾ അടങ്ങിയിട്ടുണ്ട്. ഇത് ചർമ്മത്തിന് തിളക്കം നൽകാനും മികച്ച ആരോഗ്യത്തിനും ഉത്തമമാണ്. അതിനാൽ ദിവസവും ഇവ കഴിക്കുന്നത് ശീലമാക്കുന്നത് നല്ലതാണ്.
ശൈത്യകാലത്തിൽ നിന്നും സംരക്ഷണം നൽകാൻ ഏറ്റവും മികച്ചത് ഇലക്കറികളാണ്. ചീര, മുരിങ്ങ ഇല, ഉലുവ ഇല എന്നിവയെല്ലാം പോഷകത്തോടൊപ്പം ആരോഗ്യവും പ്രദാനം ചെയ്യും. ഇവയിൽ അടങ്ങിയിട്ടുള്ള ആൻറി-ഇൻഫ്‌ലമേറ്ററി ഗുണങ്ങൾ ചർമ്മ സംരക്ഷണത്തിനും നല്ലതാണ്.
