തിരുവനന്തപുരം: ഹാങ്ചോ ഏഷ്യൻ ഗെയിംസിലെ മെഡൽ ജേതാക്കൾക്ക് പ്രഖ്യാപിച്ച പാരിതോഷികം നൽകാമെന്ന് പറഞ്ഞ് പറ്റിച്ച് സർക്കാർ. കേരളം വിടുമെന്ന കായികതാരങ്ങളുടെ ഭീഷണിക്കൊടുവിലാണ് ഒക്ടോബർ 10-ന് ചേർന്ന മന്ത്രിസഭാ യോഗത്തിൽ ഹാങ്ചോ ഏഷ്യൻ ഗെയിംസ് ജേതാക്കൾക്ക് സർക്കാർ പാരിതോഷികം പ്രഖ്യാപിച്ചത്. മറ്റുള്ള സംസ്ഥാനങ്ങൾ കായിക താരങ്ങെളെ ചേർത്ത് പിടിക്കുമ്പോൾ കേരളത്തിൽ അവഗണനയാണെന്ന് ആരോപിച്ച് കായികതാരങ്ങൾ രംഗത്ത് വന്നിരുന്നു.
സ്വർണ മെഡൽ ജേതാക്കൾക്ക് 25 ലക്ഷം രൂപയും, വെള്ളി മെഡൽ ജേതാക്കൾക്ക് 19 ലക്ഷം രൂപയും വെങ്കല മെഡൽ ജേതാക്കൾക്ക് 12.5 ലക്ഷം രൂപയുമാണ് നൽകുക. മുൻ വർഷത്തേക്കാൾ 25 ശതമാനം വർദ്ധനയോടെയാണ് അന്ന് സർക്കാർ പാരിതോക്ഷികം പ്രഖ്യാപിച്ചത്. കായികമന്ത്രി വി അബ്ദുൾറഹ്മാനാണ് ഈ തുക ഒരാഴ്ചയ്ക്കകം കായികതാരങ്ങളുടെ അക്കൗണ്ടിൽ വരുമെന്ന് പറഞ്ഞത്. എന്നാൽ, ഗെയിംസ് കഴിഞ്ഞ് മാസം ഒന്ന് പിന്നിട്ടിട്ടും ഈ തുക നൽകാൻ സർക്കാർ ഇതുവരെ തയ്യാറായിട്ടില്ല.
ചരിത്രത്തിലെ ഏറ്റവും വലിയ സംഘവുമായി ഇന്ത്യ ഏഷ്യൻ ഗെയിംസിന് ഇറങ്ങിയപ്പോൾ ടീമിന് കരുത്തായി ഉണ്ടായിരുന്നത് 45 മലയാളി താരങ്ങളാണ്. ഗെയിംസ് ചരിത്രത്തിലെ കേരളത്തിന്റെ ഏറ്റവും വലിയ പങ്കാളിത്തമായിരുന്നു ഇത്. രാജ്യത്തിനായി 13 ഇനങ്ങളിൽ മലയാളി താരങ്ങൾ കളത്തിലിറങ്ങി. 11 മെഡലുകളുമായാണ് അവർ തിരികെ കയറിയത്.
ഹോക്കിയിൽ ഒളിമ്പിക്സ് ടിക്കറ്റോടെ ചരിത്ര വിജയം സ്വന്തമാക്കിയപ്പോൾ ഗോൾവല കാത്തത് പി.ആർ. ശ്രീജേഷ് ആയിരുന്നു. പുരുഷന്മാരുടെ റിലേയിൽ സ്വർണം നേടിയ ഇന്ത്യൻ ടീമിലെ നാലു പേരിൽ മൂന്നും മലയാളികളായിരുന്നു: മുഹമ്മദ് അജ്മൽ, മുഹമ്മദ് അനസ്, അമോജ് ജേക്കബ്. ഇതിൽ അജ്മൽ മിക്സഡ് റിലേയിൽ വെള്ളിയും നേടി. സ്ക്വാഷിൽ സ്വർണമടക്കം ഇരട്ട നേട്ടവുമായി ദീപിക പള്ളിക്കലും തിളങ്ങി. ബാഡ്മിന്റൺ താരം എച്ച്.എസ് പ്രണോയിയും രണ്ട് മെഡൽ നേടി. ക്രിക്കറ്റിൽ മിന്നു മണിയും മലയാളി സാന്നിദ്ധ്യമായി, ലോംഗ് ജംപ് താരങ്ങളായ എം. ശ്രീശങ്കർ ആൻസി സോജൻ എന്നിവരും മുഹമ്മദ് അഫ്സൽ (അത്ലറ്റിക്സ്), എം.ആർ. അർജുൻ (ബാഡ്മിന്റൺ), ജിൻസൻ ജോൺസൺ (അത്ലറ്റിക്സ്) എന്നിവരും കേരളത്തിന് അഭിമാനമായി മാറി.
