ന്യൂഡൽഹി: ഭൂമിശാസ്ത്രപരമായ നിലനിൽപ്പിന് അപ്പുറം ഭാരതം എന്നത് ഒരു വിശ്വാസവും മനോഭാവവും ആണെന്ന് വിദേശകാര്യ മന്ത്രി എസ് ജയശങ്കർ. ഫെഡറേഷൻ ഓഫ് ഇന്ത്യൻ ചേംബേഴ്സ് ഓഫ് കൊമേഴ്സ് ആൻഡ് ഇൻഡസ്ട്രിയുടെ വാർഷിക പൊതുയോഗത്തിൽ സംസാരിക്കുകയായിരുന്നു അദ്ദേഹം. ” ഭാരതത്തിന് ഒരു രാഷ്‌ട്രീയ മാനമുണ്ട്, അതേപോലെ സാമ്പത്തിക മാനമുണ്ട്, സാംസ്‌കാരികവും സാമൂഹികവുമായ വിശകലനങ്ങൾ ഉണ്ട്. ഇങ്ങനെ പല വശങ്ങളുണ്ട്. എന്നെ സംബന്ധിച്ച് ഭാരതമെന്നത് ഒരു വിശ്വാസവും മനോഭാവവുമാണെന്നും” അദ്ദേഹം പറഞ്ഞു.
കൊറോണ പ്രതിസന്ധിയെ രാജ്യം എങ്ങനെയാണ് ശക്തമായി പ്രതിരോധിച്ചത് എന്നതിനെ കുറിച്ചും അദ്ദേഹം സംസാരിച്ചു. ” നൂറ്റാണ്ടിലൊരിക്കൽ എന്നത് പോലെയുള്ള ഒരു പ്രതിസന്ധിക്കാണ് നമ്മൾ എല്ലാവരും സാക്ഷ്യം വഹിച്ചത്. ആ സമയത്ത് പോലും നിരവധി യാത്രകൾ ചെയ്യേണ്ടി വരുകയും, വ്യത്യസ്ത സമൂഹങ്ങളെ കാണേണ്ടി വരികയും ചെയ്ത വ്യക്തിയെന്ന നിലയിൽ ഒരു കാര്യം എനിക്ക് ഉറപ്പിച്ച് പറയാൻ സാധിക്കും. നമ്മുടെ രാജ്യം ഏറ്റവും മികച്ച രീതിയിലാണ് അതിനെ കൈകാര്യം ചെയ്തത്. കൊറോണയെന്ന പ്രതിസന്ധിയിൽ നിന്ന് വിജയകരമായി കരകയറാൻ ഇന്ത്യയ്‌ക്ക് സാധിച്ചുവെന്നത് അഭിമാനകരമായ കാര്യമാണെന്നും” അദ്ദേഹം പറഞ്ഞു.
ബിസിനസ് എന്ന് പറയുന്നത് ആധുനിക യുഗത്തിലേക്കുള്ള ചുവടുവയ്പ്പിൽ വലിയ പങ്കാണ് വഹിക്കുന്നതെന്നും, ഒരു രാജ്യത്തിന്റെ പുരോഗതിയെ വളരെ അധികം സഹായിക്കുന്നുണ്ടെന്നും അദ്ദേഹം കൂട്ടിച്ചേർത്തു. ഒരു വ്യവസായം തുടങ്ങുമ്പോൾ, അല്ലെങ്കിൽ സാങ്കേതിക വിദ്യ പ്രചരിപ്പിക്കുമ്പോൾ എല്ലാം നിങ്ങൾ പങ്കുവയ്‌ക്കുന്ന ആശയങ്ങളും ചിന്താഗതികളും എല്ലാം രാജ്യത്തിനെ ഒന്നാകെയാണ് സഹായിക്കുന്നത്. ഇന്ത്യ മുന്നോട്ട് കുതിക്കുന്നതിനുള്ള ഒരു എഞ്ചിൻ പോലെയാണ് ഈ ആശയങ്ങളും പദ്ധതികളുമെല്ലാം പ്രവർത്തിക്കുന്നതെന്നും എസ്.ജയശങ്കർ പറയുന്നു.
