ജയറാമിന് പിറന്നാൾ സമ്മാനവുമായി ഓസ്ലർ സിനിമയുടെ അണിയറപ്രവർത്തകർ. താരത്തിന്റെ പിറന്നാൾ ദിനമായ ഇന്ന് പുതിയ പോസ്റ്ററാണ് അണിയറപ്രവർത്തകർ പുറത്ത് വിട്ടിരിക്കുന്നത്. നിഗൂഢത നിറഞ്ഞ കണ്ണുമായി നോക്കുന്ന ജയറാമിനെയാണ് പോസ്റ്ററിൽ കാണാൻ കഴിയുന്നത്. പോലീസ് ഉദ്യോഗസ്ഥന്റെ വേഷത്തിലാണ് ചിത്രത്തിൽ ജയറാം എത്തുന്നത്. നടന്റെ അഭിനയ ജീവിതത്തിലെ അവിസ്മരണീയ കഥാപാത്രമായിരിക്കും ഇതിലെ അബ്രഹാം ഓസ്ലർ എന്ന പ്രതീക്ഷയിലാണ് ആരാധകർ.
2024 ജനുവരി 11നാണ് ചിത്രം തിയേറ്ററുകളിൽ എത്തുന്നത്. താടിയും മുടിയും നരച്ച് അൽപ്പം പ്രായം തോന്നിപ്പിക്കുന്ന ലുക്കിലാണ് ജയറാം പ്രേക്ഷകർക്ക് മുൻപിൽ എത്തുന്നത്. ചിത്രത്തിൽ അതിഥി വേഷത്തിൽ മമ്മൂട്ടിയും എത്തുമെന്ന അഭ്യൂഹങ്ങളുണ്ട്. അഞ്ചാം പാതിരായ്‌ക്ക് ശേഷം മിഥുൻ സംവിധാനം ചെയ്യുന്ന ചിത്രമാണ് ‘അബ്രഹാം ഓസ്ലർ’. മെഡിക്കൽ പശ്ചാത്തലത്തിൽ ഒരുങ്ങുന്ന ഒരു ക്രൈം ത്രില്ലറാണ് അബ്രഹാം ഓസ്ലർ. ഏറെ ദുരൂഹതകളും സസ്പെൻസുമൊക്കെ നിറഞ്ഞ ഒരു ഇൻവെസ്റ്റിഗേറ്റീവ് ത്രില്ലറാണ്.
പോലീസ് കമ്മീഷണർ ഒരു കൊലക്കേസ് അന്വേഷിക്കുന്നതാണ് അബ്രഹാം ഓസ്ലറിലിന്റെ പ്രമേയം. ഡോ. രൺധീർ കൃഷ്ണൻ തിരക്കഥ ഒരുക്കുന്ന ചിത്രത്തിൽ അർജുൻ അശോകൻ, ജഗദീഷ്, ദിലീഷ് പോത്തൻ, അനശ്വര രാജൻ, സെന്തിൽ കൃഷ്ണ, അർജുൻ നന്ദകുമാർ, ആര്യ സലിം, അസീം ജമാൽ തുടങ്ങി താരനിരയും അണിനിരക്കുന്നുണ്ട്.
