ഡിസംബർ 19ന് നടക്കുന്ന ഐപിഎൽ താരലേലത്തിന് മുന്നോടിയായി ഗൂഗിളിൽ ട്രെൻഡിംഗായി മുൻ ഇന്ത്യൻ നായകൻ മഹേന്ദ്രസിംഗ് ധോണിയുടെ ജഴ്‌സി നമ്പർ 7. ഇതോടനുബന്ധിച്ച് ഏഴാം നമ്പറിന്റെ വ്യത്യസ്തമായ സവിശേഷതകൾ ഗൂഗിൾ സമൂഹമാദ്ധ്യമങ്ങളിൽ പങ്കിട്ടു. നിരവധി ബ്രാൻഡുകളും ഇൻഫ്‌ളുവൻസേഴ്‌സും ജീവിതത്തിന്റെ വിവിധ ഘട്ടങ്ങളെ തമ്മിൽ ബന്ധിപ്പിക്കുന്നതിനായി ഏഴാം നമ്പർ ഉപയോഗിക്കുന്നുണ്ട്. സമൂഹമാദ്ധ്യമങ്ങളിലെ ഇന്നത്തെ ഏറ്റവും വലിയ ചർച്ചാ വിഷയങ്ങളിൽ ഒന്നായി മാറിയിരിക്കുകയാണ് ‘തല ഫോർ എ റീസൺ’.
നമ്പർ 7 ന്റെ പ്രത്യേകത എന്താണെന്ന് ഗൂഗിൾ എക്‌സിൽ പങ്കുവച്ച പോസ്റ്റിൽ സെർച്ച് എൻജിനോട് ചോദിച്ചു. ‘മഴവില്ലിന് ഏഴ് നിറങ്ങളുണ്ട്, ആഴ്ചയിൽ ഏഴ് ദിവസം, ലോകത്തിലെ ഏഴ് അത്ഭുതങ്ങൾ, ഏഴ് പ്രധാന സമുദ്രങ്ങൾ, കൂടാതെ മൊത്തം ഭൂഖണ്ഡങ്ങളുടെ എണ്ണം പോലും ഏഴ്!’ എന്ന മറുപടിയാണ് ഗൂഗിൾ സെർച്ച് എൻജിൻ നൽകിയത്. ഏഴ് എന്ന സംഖ്യ പോലെ വ്യത്യസ്ത മേഖലകളിൽ ഇത്രയധികം അർത്ഥങ്ങളും റഫറൻസുകളും ഉള്ള മറ്റൊരു സംഖ്യയും ഇല്ല. അതിനാൽ, ഇത് വളരെ പ്രധാനപ്പെട്ട ഒരു സംഖ്യയാണെന്നും ഗൂഗിൾ കൂട്ടിച്ചേർത്തു.
2019-ൽ, ധോണിയുടെ 38-ാം ജന്മദിനത്തിൽ എക്‌സിൽ 7ന്റെ പ്രത്യേകതകൾ നിരത്തി കൊണ്ട് മുൻ ഇന്ത്യൻ ക്രിക്കറ്റ് താരം വീരേന്ദർ സെവാഗും ആശംസകൾ നേർന്നിരുന്നു. ‘ലോകത്തിലെ 7 ഭൂഖണ്ഡങ്ങൾ, ആഴ്ചയിൽ 7 ദിവസം, ഒരു മഴവില്ലിൽ 7 നിറങ്ങൾ, 7 മ്യൂസിക്കൽ നോട്ട്‌സ്, മനുഷ്യനിലെ 7 ചക്രങ്ങൾ, വിവാഹത്തിലെ 7 ഫെറകൾ, ലോകത്തിലെ 7 അത്ഭുതങ്ങൾ, ഏഴാം മാസത്തിലെ 7-ാം ദിവസം.- ക്രിക്കറ്റിലെ വിസ്മയത്തിന് ആശംസകളെന്നാണ് വീരു അന്ന് എക്‌സിൽ കുറിച്ചത്.
ഏഴാം മാസത്തിലെ 7-ാം തീയതി ജനിച്ചത് കൊണ്ടാണ് താൻ ഏഴാം നമ്പർ ജേഴ്സി ധരിക്കുന്നതെന്ന് എംഎസ് ധോണി ഒരു പഴയ അഭിമുഖത്തിൽ വെളിപ്പെടുത്തിയിരുന്നു. ജൂലൈ 7ന് താരത്തിന്റെ ജന്മദിനമായതിനാലാണ് എം എസ് ധോണി ഏഴാം നമ്പർ ജേഴ്സി ധരിക്കുന്നത് എന്നുൾപ്പെടെയുള്ള കമന്റുകളാണ് ആരാധകർ പങ്കുവയ്‌ക്കുന്നത്. നിലവിൽ ഐപിഎല്ലിൽ ചെന്നൈ സൂപ്പർ കിംഗ്‌സ് താരത്തിന് കീഴിലാണ് ഇത്തവണയും ഇറങ്ങുക.
