മനാമ: സയൻസ് ഇന്റർനാഷണൽ ഫോറം (SIF ) ബഹ്റൈൻ ഇക്കഴിഞ്ഞ മെയ് മാസം സംഘടിപ്പിച്ച ശാസ്ത്ര പ്രതിഭ പരീക്ഷയുടെ (SPC 2023 ) അവാർഡ് ദാന ചടങ്ങുകൾ ഇക്കഴിഞ്ഞ ഡിസംബർ 8 നു ബഹ്റൈൻ സൊസൈറ്റി ഓഫ് എഞ്ചിനീയറിംഗ് ഹാളിൽ വെച്ച് നടന്നു. ശാസ്ത്ര പ്രതിഭകൾക്കും, ശാസ്ത്രപ്രതിഭ റണ്ണേഴ്സ് അപ്പുകൾക്കും, എ പ്ലസ് ഗ്രേഡ് നേടിയവർക്കും സർടിഫിക്കറ്റുകളും ഫലകവും വിതരണം ചെയ്തു.
അവാർഡ് ദാനചടങ്ങ് ബഹ്റൈനിലെ അഹല്യ യൂണിവേഴ്സിറ്റി പ്രസിഡന്റ് പ്രൊഫസർ മൻസൂർ അൽ അലി ഉദ്ഘാടനം ചെയ്തു. സയൻസ് ഇന്റർനാഷണൽ ഫോറം പ്രസിഡന്റ് അദ്ധ്യക്ഷത വഹിച്ച ചടങ്ങിൽ ഡോക്ടർ രവി വാര്യർ, ഡോക്ടർ ബാബു രാമചന്ദ്രൻ, പ്രൊഫസർ ശൗകി അഹമ്മദ് എന്നിവർ ആശംസകൾ അർപ്പിച്ചു. ബഹ്റൈൻ സ്റ്റുഡന്റസ് ഇന്നോവേഷൻ കോൺഗ്രസിൽ (BSIC ) ജൂനിയർ, സീനിയർ ക്യാറ്റഗറിയിൽ വിജയികളായ ബഹ്റൈൻ ഇന്ത്യ സ്കൂളിന് ട്രോഫിയും അതിൽ വിജയികളായ വിദ്യാർത്ഥികൾക്ക് മെഡലും സെര്ടിഫിക്കറ്റും വിതരണം ചെയ്തു.
ഇതേ ചടങ്ങിൽ വെച്ച് SPC / BSIC സ്കൂൾ കോർഡിനേറ്റർസ് ആയ ടീച്ചേഴ്സിനെയും ഫലകങ്ങൾ നൽകി ആദരിച്ചു. ചടങ്ങിൽ SIF ബഹ്റൈൻ ജനറൽ സെക്രട്ടറി പ്രശാന്ത് ധർമരാജ് സ്വാഗതവും, BSIC കോർഡിനേറ്റർ പ്രവീൺ പിള്ള നന്ദിയും പറഞ്ഞു. ഏകദേശം അഞ്ഞൂറിൽപ്പരം ആളുകൾ പങ്കെടുത്ത ചടങ്ങിൽ ബഹ്റൈനിലെ അദ്ധ്യാപകർ, സംയോജകർ, വിദ്യാർത്ഥികൾ, രക്ഷിതാക്കൾ എന്നിവർ പങ്കെടുത്തു.