ചെന്നൈ: മേൽക്കൂര തകർന്ന് വീണ് ഒരു കുടുംബത്തിലെ നാല് പേർ മരിച്ചു. തമിഴ്നാട് അംബികാപുരം ഗാന്ധി സ്ട്രീറ്റിലാണ് സംഭവം. ശാന്തി (75), വിജയലക്ഷ്മി (45), പ്രദീപ (12), ഹരിണി (10) എന്നിവരാണ് മരിച്ചത്. ഇന്ന് പുലർച്ചെയാണ് അപകടമുണ്ടായത്. നാല് പേരും സംഭവ സ്ഥലത്ത് വച്ച് തന്നെ മരണപ്പെട്ടു.
ഗൃഹനാഥനായ മാരിമുത്തു ബന്ധുവിന്റെ സംസ്കാര ചടങ്ങുകളിൽ പങ്കെടുക്കുന്നതിനായി ചെന്നൈയിലേക്ക് പോയതിന് പിന്നാലെയാണ് അപകടമുണ്ടായത്. മാരിമുത്തുവിന്റെ അമ്മയും ഭാര്യയും മക്കളുമാണ് മരണപ്പെട്ടത്. 1972-ൽ നിർമ്മിച്ച വീടാണ് തകർന്ന് വീണത്. രാവിലെ പ്രദേശവാസികളാണ് വീടിന്റെ മേൽക്കൂര തകർന്ന് കിടക്കുന്നത് കണ്ടത്. ഉടൻ പോലീസിൽ വിവരമറിയിക്കുകയായിരുന്നു.
വീടിന്റെ ചുവരുകൾക്ക് കേടുപാടുകൾ സംഭവിച്ചിട്ടില്ല. മറ്റ് ശബ്ദങ്ങളാെന്നും കേട്ടിട്ടില്ലെന്ന് നാട്ടുകാർ പറയുന്നു. പോലീസും അഗ്നിശമനാ സേനയും സ്ഥലത്തെത്തി മൃതദേഹങ്ങൾ പുറത്തെടുത്തു. മൃതദേഹങ്ങൾ പോസ്റ്റമോർട്ടത്തിനായി ആശുപത്രിയിലേക്ക് മാറ്റിയിട്ടുണ്ട്.