ആരോഗ്യപ്രദമായ ശരീരത്തിന് ഏറ്റവും പ്രധാനമായി വേണ്ടതാണ് ഹൃദയാരോഗ്യം. പ്രത്യേകിച്ച് ശൈത്യ കാലത്ത് ഹൃദയാരോഗ്യം സംരക്ഷിക്കേണ്ടത് അത്യന്താപേഷിതമാണ്. ആരോഗ്യകരമായ ജീവിതശൈലിയും ശരിയായ ഭക്ഷണശീലവും പിന്തുടര്‍ന്നാല്‍ ഹൃദയാരോഗ്യം സംരക്ഷിക്കാനാകും. ഉറക്കമില്ലായ്മ, ഇന്നത്തെ കാലത്തെ ഭക്ഷണരീതികള്‍, പുകവലി, മദ്യപാനം എന്നിവയാണ് ഹൃദ്രോഗങ്ങളുടെ പ്രധാന കാരണം.
തണുപ്പ് കാലത്ത് ശരീരത്തിലെ സ്വാഭാവിക താപനില നിലനിർത്താൻ വളരെ ബുദ്ധിമുട്ടാണ്. ശാരീരിക താപനില കുറയുന്നത് മൂലം രക്തക്കുഴലുകൾ ചുരുങ്ങുന്നതിനും രക്തസമ്മർദ്ദം വർദ്ധിപ്പിക്കുന്നതിനും കാരണമാകുന്നു. ഇത് ഹൃദയസംബന്ധമായ പ്രശ്നങ്ങളിലേക്ക് വഴിവെക്കുന്നു. എന്നാൽ ശൈത്യകാലത്ത് ഹൃദയാരോഗ്യം മെച്ചപ്പെടുത്താൻ നിരവധി വഴികളുണ്ട്. അവ ഏതൊക്കെയെന്ന് നോക്കാം…
വ്യായാമം ചെയ്യുക
തണുപ്പുകാലത്ത് ശരീരത്തിന്റെ സ്വാഭാവിക താപനില നിലനിർത്താൻ പ്രധാനമായും ശീലിക്കേണ്ടതാണ് വ്യായാമം. ദിവസേന വ്യായാമം ചെയ്യുന്നതിലൂടെ ഒട്ടനവധി ഗുണങ്ങൾ വന്ന് ചേരും. ദിവസവും 30 മിനിറ്റെങ്കിലും ശരീരം വിയര്‍ക്കും വിധം നന്നായി വ്യായാമം ചെയ്യുക. ഇത് ഹൃദയാരോഗ്യം സംരക്ഷിക്കാൻ സഹായിക്കുന്നു.
ഭക്ഷണക്രമം
ഗോതമ്പ്, ഓട്ട്സ് എന്നിവകൊണ്ടുള്ള ഭക്ഷണരീതികള്‍ ശീലമാക്കുക. ഉപ്പിന്റെയും, പഞ്ചസാരയുടെയും ഉപയോഗം നിയന്ത്രിക്കുന്നതിലൂടെ ഹൃദ്രോഗത്തെ അകറ്റാനാകും. നിത്യേന ഭക്ഷണക്രമത്തില്‍ പഴങ്ങളും പച്ചക്കറികളും ഉള്‍പ്പെടുത്തണം. ആപ്പിള്‍, മാതളം, കാരറ്റ്, തക്കാളി, ചീര, ബീറ്ററൂട്ട്, പയര്‍ എന്നീ ഭക്ഷണങ്ങള്‍ ഹൃദയത്തിന്റെ ആരോഗ്യത്തിന് നല്ലതാണ്.
ശരീരത്തിൽ ജലാംശം നിലനിർത്തുക
ശരീരത്തിൽ ജലാംശം നിലനിർത്തുക എന്നത് ശൈത്യകാലത്ത് പ്രധാനമായി ശ്രദ്ധിക്കേണ്ട ഒന്നാണ്. പ്രതിദിനം കുറഞ്ഞത് എട്ട് ഗ്ലാസ് വെള്ളമെങ്കിലും കുടിക്കേണ്ടതുണ്ട്. ഇത് ഹൃദയാരോഗ്യത്തിന് മികച്ചതാണ്.
അമിതമായി ഭക്ഷണം കഴിക്കുന്നത് ഒഴിവാക്കണം
തണുപ്പ് കാലത്ത് അമിതമായി ഭക്ഷണം കഴിക്കുന്നത് ഒഴിവാക്കണം. ശരീരത്തിലെ അവയവങ്ങളുടെ മെച്ചപ്പെട്ട പ്രവർത്തനത്തിന് ഇത് വളരെ പ്രയോജനകരമാണ്. കലോറി, കൊഴുപ്പ് അടങ്ങിയ ഭക്ഷണങ്ങൾ അധികം കഴിക്കാതിരിക്കാൻ ശ്രദ്ധിക്കണം.
ആവശ്യത്തിന് ഉറങ്ങുക
ഉറക്കക്കുറവും ഹൃദ്രോഗത്തിന് പ്രധാന കാരണങ്ങളിലൊന്നാണ്. ഒരു ദിവസം എട്ട് മണിക്കൂര്‍ നിർബന്ധമായും ഉറങ്ങണം. ആറ് മണിക്കൂര്‍ കുറവ് ഉറങ്ങുന്നവരില്‍ ഹൃദയാഘാതം, ഹൃദയ ധമനിയില്‍ ബ്ലോക്ക് എന്നീ പ്രശനങ്ങളുണ്ടാകാന്‍ സാധ്യത കൂടുതലാണ്.
