അദ്ധ്യാപന നിയമനത്തിനുള്ള സി-ടെറ്റ്, സെറ്റ് പരീക്ഷകൾ നടക്കുന്നത് ഒരേ ദിവസം. ജനുവരി 21-നാണ് രണ്ടു പരീക്ഷകളും നടത്തുന്നത്. ഇതോടെ ആശങ്കയിലായിരിക്കുകയാണ് ഉദ്യോഗാർത്ഥികൾ. കേന്ദ്രസർക്കാർ നിയന്ത്രണത്തിലുള്ള സ്‌കൂളുകളിലേക്കുള്ള അദ്ധ്യാപക നിയമനത്തിനുള്ള പരീക്ഷയാണ് സി-ടെറ്റ്. സെറ്റ് ആകട്ടെ കേരളത്തിലെ ഹയർസെക്കൻഡറി അദ്ധ്യാപക നിയമനത്തിനുള്ള യോഗ്യതക്കായി സംസ്ഥാന സർക്കാർ നടത്തുന്ന പരീക്ഷയും. സി-ടെറ്റ് ഇന്ത്യ മുഴുവൻ നടക്കുന്നതിനാൽ തന്നെ മാറ്റി വയ്‌ക്കുന്നത് പ്രായോഗികമല്ല. അതിനാൽ സെറ്റ് മാറ്റിവയ്‌ക്കാൻ ഉദ്യോഗാർത്ഥികൾ ആവശ്യപ്പെടുന്നുണ്ട്.
രണ്ടു പരീക്ഷയുടെയും യോഗ്യത ബിരുദം, ബിരുദാനന്തര ബിരുദം, ബി.എഡ്, അല്ലെങ്കിൽ എം എഡ് എന്നിവയാണ്. അതിനാൽ തന്നെ നിരവധി ഉദ്യോഗാർത്ഥികൾ രണ്ട് പരീക്ഷകൾ എഴുതുന്നതിനും അപേക്ഷ നൽകിയിട്ടുണ്ട്. നിലവിലെ അവസ്ഥയിൽ ഇവർക്ക് ഏതെങ്കിലും ഒരു പരീക്ഷ മാത്രമേ എഴുതാൻ സാധിക്കൂ.
