ലക്നൗ: അയോദ്ധ്യാ രാമക്ഷേത്രത്തിലെ ശ്രീകോവിലിനുള്ളിൽ പ്രതിഷ്ഠിച്ച രാമവിഗ്രഹത്തിന്റെ പൂർണ ചിത്രം പുറത്ത്. സ്വർണ അമ്പും വില്ലുമേന്തി നിൽക്കുന്ന ഭഗവാൻ രാമന്റെ ബാലരൂപമാണ് വിഗ്രഹത്തിൽ കൊത്തിയെടുത്തിരിക്കുന്നത്. കൃഷ്ണശിലയിൽ കൊത്തിയെടുത്തിരിക്കുന്ന വിഗ്രഹത്തിന്റെ മുഖവും അഞ്ച് വയസ് പ്രായം തോന്നിക്കുന്ന രൂപവും ചിത്രത്തിൽ കാണാനാകും.
കഴിഞ്ഞ ദിവസമാണ് രാംലല്ലയുടെ വിഗ്രഹം ശ്രീകോവിലിൽ പ്രതിഷ്ഠിച്ചത്. വിഗ്രഹത്തിന്റെ കണ്ണുകൾ മാത്രം മൂടിയ ചിത്രം ക്ഷേത്ര ട്രസ്റ്റ് രാവിലെ പങ്കുവച്ചിരുന്നു. കർണാടകയിലെ പ്രശസ്ത ശിൽപിയായ അരുൺ യോഗിരാജാണ് 51 അടി ഉയരവും 1.5 ടൺ ഭാരവുമുള്ള രാംലല്ലയുടെ വിഗ്രഹം നിർമ്മിച്ചത്.
പ്രാണപ്രതിഷ്ഠാദിനം വരെ ക്ഷേത്രത്തിനുള്ളിൽ പ്രത്യേക പൂജകൾ നടക്കും. ഔഷധക്കൂട്ടുകൾ, കസ്തൂരി, ധാന്യങ്ങൾ, നെയ്യ് തുടങ്ങിയവ ഉപയോഗിച്ചുള്ള സ്‌നാനവും പ്രത്യേക പൂജകളുമാണ് ഇന്ന് നടന്നത്. 121ഓളം ആചാര്യന്മാരാണ് താന്ത്രികവിധി പ്രകാരമുള്ള കർമ്മങ്ങൾക്ക് മേൽനോട്ടം വഹിച്ചത്. പ്രാണപ്രതിഷ്ഠക്ക് ശേഷം തൊട്ടടുത്ത ദിവസം മുതൽ പൊതുജനങ്ങൾക്ക് ക്ഷേത്രദർശനം അനുവദിക്കും.
