തീയേറ്ററുകളിൽ വൻ വിജയം നേടി പ്രദർശനം തുടരുന്ന ചിത്രമാണ് ഓസ്‌ലർ. മിഥുൻ മാനുവൽ തോമസ് സംവിധാനം ചെയ്ത ചിത്രത്തിൽ ജയറാമും മമ്മൂട്ടിയും ശ്രദ്ധേയമായ വേഷങ്ങളിൽ എത്തുന്നു. വർഷങ്ങൾക്ക് ശേഷം റീമിക്‌സ് ചെയ്ത് എത്തിയ പൂമാനമേ.. എന്ന ഗാനവും മലയാളികൾ ഏറ്റെടുത്ത് കഴിഞ്ഞു. ഒരുകൂട്ടം യുവതാരങ്ങളും ചിത്രത്തിൽ പ്രധാന കഥാപാത്രങ്ങളാകുന്നുണ്ട്. ഇക്കൂട്ടത്തിൽ മമ്മൂട്ടിയുടെ ചെറുപ്പകാലം അവതരിപ്പിച്ച ആഡം സാബിയും പ്രേക്ഷക പ്രശംസ നേടുകയാണ്.
ആഡം സാബിയുടെ ആദ്യ ചിത്രമാണ് ഓസ്‌ലർ. മമ്മൂട്ടിയുമായി നല്ല സാമ്യം തോന്നുന്ന കാസ്റ്റിംഗായിരുന്നു എന്ന് തുടക്കം മുതൽ പ്രേക്ഷകർ അഭിപ്രായപ്പെട്ടിരുന്നു. ഇപ്പോഴിതാ ചിത്രത്തിലേക്ക് എത്തിപ്പെട്ടതിനെ കുറിച്ച് തുറന്നു പറയുകയാണ് യുവതാരം. ഓഡീഷൻ വഴിയാണ് സിനിമയിൽ എത്തിയതെന്നും ചിത്രത്തിൽ മമ്മൂട്ടിയുടെ ചെറുപ്പകാലമാണ് താൻ അവതരിപ്പിക്കാൻ പോകുന്നതെന്ന് സ്‌ക്രിപ്റ്റ് കിട്ടുന്നതുവരെ അറിയില്ലായിരുന്നെന്നും ആദം സാബി പറയുന്നു.
‘ വീട്ടുകാരറിയാതെയാണ് സിനിമയിൽ അഭിനയിക്കാനെത്തിയത്. ഒരു സുഹൃത്ത് വഴിയാണ് ഓസ്‌ലറിൽ യുവതാരങ്ങളെ തേടുന്നുണ്ടെന്ന കാര്യം അറിഞ്ഞത്. ഒാഡീഷൻ സമയത്ത് ഒരു ഡയലോഗ് തരികയും അത് വ്യത്യസ്തമായ രീതിയിൽ അഭിനയിച്ചുകാണിക്കാനും ആവശ്യപ്പെട്ടു. അങ്ങനെ അതിൽ വിജയിച്ച് സിനിമയിലേയ്‌ക്ക് തിരഞ്ഞെടുക്കപ്പെട്ടു. എന്നാൽ സ്‌ക്രിപ്റ്റ് കിട്ടിയപ്പോഴാണ് മമ്മൂട്ടിയുടെ ചെറുപ്പകാലമാണ് ഞാൻ അഭിനയിക്കാൻ പോകുന്നതെന്ന് മനസിലായത്.
തുടക്കക്കാരനെന്ന നിലയിൽ എനിക്ക് കിട്ടിയ വലിയൊരു ഭാഗ്യമായിരുന്നു ഈ കഥാപാത്രം. ഒരുപാട് സന്തോഷം തോന്നി. അതിനേക്കാൾ കൂടുതൽ ഉത്തരവാദിത്തവും തോന്നി. മമ്മൂക്ക തന്റെ കഥാപാത്രം മനോഹരമാക്കുമെന്ന് എല്ലാവർക്കുമറിയാം. അതുപോലെ എനിക്കും ഉത്തരവാദിത്വമുണ്ടല്ലോ. മമ്മൂക്കയുടെ ചെറുപ്പകാലം അഭിനയിച്ച് ഞാനും പ്രേക്ഷകരെ ബോധ്യപ്പെടുത്തേണ്ടതുണ്ടല്ലോ. ഒരു ചെറിയ പിഴവ് പോലും സംഭവിക്കാൻ പാടില്ല. മമ്മൂക്കയോടുള്ള ഇഷ്ടത്തിന്റെ ഒരു ചെറിയ അംശമെങ്കിലും പ്രേക്ഷകർക്ക് എന്നോടും തോന്നിക്കണം.
എനിക്ക് നല്ല പേടിയുണ്ടായിരുന്നു. എന്നാൽ സംവിധായകനും അണിയറ പ്രവർത്തകരും എനിക്ക് നല്ല സപ്പോർട്ട് തന്നു. അതുകൊണ്ടുതന്നെയാണ് ഈ കഥാപാത്രം എനിക്ക് നന്നായി അവതരിപ്പിക്കാൻ കഴിഞ്ഞത്. സിനിമയുടെ ഷൂട്ടിംഗ് കഴിഞ്ഞ ശേഷമാണ് കൂട്ടുകാർ കാര്യമറിഞ്ഞത്. അവർ തന്നെയാണ് എന്റെ വീട്ടിലും ഇക്കാര്യം അറിയിച്ചത്. സിനിമയുടെ ട്രെയിലർ പുറത്തുവന്നപ്പോൾ വീട്ടുകാർക്കും സന്തോഷമായി.’
