തിരുവനന്തപുരം: ക്ഷേമ പെൻഷൻ മുടങ്ങി 5 മാസം പിന്നിടുമ്പോഴും നവ കേരള സദസ് നടത്തിയതും കേരളീയം പരിപാടി സംഘടിപ്പിച്ചതും കേരളത്തിനാവശ്യമാണെന്ന വാദവുമായി മുഖ്യമന്ത്രി പിണറായി വിജയൻ. കേരളീയം ഒരു തരത്തിലും ധൂർത്തല്ലെന്നും മുഖ്യമന്ത്രി അറിയിച്ചു. നന്ദി പ്രമേയ ചർച്ചയ്ക്കിടെയായിരുന്നു മുഖ്യമന്ത്രിയുടെ വാദം.
കേരളത്തിൽ കേരളീയം പോലുള്ള പരിപാടികൾ ഇതുവരെ നടത്താൻ കഴിഞ്ഞിരുന്നില്ലല്ലോ എന്നാണ് പൊതു സമൂഹം വിചാരിക്കുന്നത്. കേരളീയം സംസ്ഥാനത്തിന്റെ പുരോഗതിയാണ് വിലയിരുത്തുന്നതെന്നും അത് ധൂർത്തായിരുന്നില്ലെന്നും മുഖ്യമന്ത്രി പറഞ്ഞു. നാടിന്റെ പുരോഗതിയും മുന്നോട്ടു പോകാനുള്ള ആസൂത്രണത്തിന്റെ ഭാഗവുമാണ് കേരളീയം. കേവലം ആഘോഷ പരിപാടികളായി മാത്രം കാണേണ്ടതില്ലെന്നും വരും വർഷങ്ങളിലും കേരളീയം മുന്നോട്ടു കൊണ്ടു പോകാൻ സാധിക്കണമെന്നും അദ്ദേഹം അറിയിച്ചു.
