ചണ്ഡീഗഢ്: മേയർ തിരഞ്ഞെടുപ്പിൽ അടിതെറ്റി പ്രതിപക്ഷ സഖ്യം. ഇൻഡി മുന്നണിക്കെതിരെ വിജയം നേടി ബിജെപി സ്ഥാനാർത്ഥി മനോജ് സോങ്കർ. എഎപി- കോൺഗ്രസ് സംയുക്ത സ്ഥാനാർത്ഥി കുൽദീപ് കുമാറിനെ 16 വോട്ടുകൾക്കാണ് മനോജ് സോങ്കർ പരാജയപ്പെടുത്തിയത്. ഇൻഡി മുന്നണിയുടെ കുൽദീപ് കുമാറിന് 12 വോട്ട് ലഭിച്ചപ്പോൾ എട്ട് വോട്ടുകൾ അസാധുവായി. എൻഡിഎ സർക്കാരിനെ പരാജയപ്പെടുത്തുകയെന്ന ലക്ഷ്യത്തോടെ ദേശീയ തലത്തിൽ പ്രതിപക്ഷാംഗങ്ങളെ ‘ഐക്യപ്പെടുത്തി’ ആരംഭിച്ച ഇൻഡി മുന്നണി ആദ്യമായി നേരിട്ട ഒരു തിരഞ്ഞെടുപ്പായിരുന്നു ഇത്. ആംആദ്മിയും കോൺഗ്രസും ഒന്നിച്ചുനിന്നെങ്കിലും ബിജെപി സ്ഥാനാർത്ഥിയെ പരാജയപ്പെടുത്താൻ കഴിയാതെ വരികയായിരുന്നു. എക്സ് ഒഫീഷ്യോ അംഗമായ കിരൺ ഖേറിന്റെ വോട്ടും മനോജ് കുമാർ സോങ്കറിന് ലഭിച്ചു.
എട്ട് വർഷത്തെ ബിജെപി ഭരണം അവസാനിപ്പിക്കാനുള്ള ഇൻഡി സഖ്യത്തിന്റെ വ്യാമോഹത്തിനുള്ള തിരിച്ചടിയാണ് ഫലപ്രഖ്യാപനമെന്ന് രാഷ്‌ട്രീയ നിരീക്ഷകർ വിലയിരുത്തുന്നു. 35 അംഗ മുനിസിപ്പൽ കോർപറേഷനിൽ ബിജെപിയ്‌ക്ക് 15 അംഗങ്ങളും ഇൻഡി മുന്നണിയ്‌ക്ക് 15 അംഗങ്ങളുമാണുള്ളത്. ഹരിയാനയുടെയും പഞ്ചാബിന്റെയും തലസ്ഥാനമായ ചണ്ഡീഗഢിൽ ഇൻഡി സഖ്യം രൂപീകരിച്ചതിന് ശേഷം നടന്ന ആദ്യ തിരഞ്ഞെടുപ്പാണിത്. വരുന്ന ലോക്സഭാ തിരഞ്ഞെടുപ്പിൽ ഇൻഡി സഖ്യത്തിന്റെ വിജയപരാജയ സാധ്യതയെ സൂചിപ്പിക്കുന്ന ഫലം കൂടിയാണിത്.
