ന്യൂഡൽഹി: കൊടും തണുപ്പിന് പിന്നാലെ രാജ്യ തലസ്ഥാനത്ത് ശക്തമായ ഇടിയും മഴയും. ഡൽഹിയിൽ ഇന്നലെ പുലർച്ചെ ആരംഭിച്ച ശക്തമായ മഴയെ തുടർന്ന് റോഡുകളിൽ വെള്ളക്കെട്ടുണ്ടാവുകയും ജനജീവിതം ദുഃസഹമാവുകയും ചെയ്തു. വരും ദിവസങ്ങളിലും ഡൽഹിയിൽ നിലവിലെ കാലാവസ്ഥ തുടരുമെന്ന് കേന്ദ്ര കാലാവസ്ഥ നിരീക്ഷണ കേന്ദ്രം അറിയിച്ചു.
നിലവിൽ ഡൽഹിയിൽ മിതമായ മഴയാണ് ലഭിച്ചുകൊണ്ടിരിക്കുന്നത്. വരും മണിക്കൂറുകളിൽ ഇതിന് മാറ്റം സംഭവിച്ചേക്കാം. ശക്തമായ കാറ്റിനും ഇടിമിന്നലോട് കൂടിയ മഴയ്ക്കും സാധ്യതുയുണ്ട്. അടുത്ത മൂന്ന് മണിക്കൂറിനുള്ളിൽ ഡൽഹിയുടെ വിവിധ പ്രദേശങ്ങളിൽ ശക്തമായ മഴയ്ക്കും കാറ്റിനും സാധ്യതയുണ്ടെന്നും കാലാവസ്ഥാ നിരീക്ഷണ കേന്ദ്രത്തിന്റെ അറിയിപ്പുണ്ട്.
ഉത്തരേന്ത്യൻ സംസ്ഥാനങ്ങളിൽ ശക്തമായ മഞ്ഞുവീഴ്ചയും ആരംഭിച്ചിരിക്കുകയാണ്. ജമ്മു കശ്മീർ, ഹിമാചൽ പ്രദേശ്, ഉത്തരാഖണ്ഡ് തുടങ്ങിയ സംസ്ഥാനങ്ങളിലാണ് മഞ്ഞുവീഴ്ച ആരംഭിച്ചിരിക്കുന്നത്. വരും ദിവസങ്ങളിലും മഞ്ഞ് വീഴ്ച ശക്തമാകാൻ സാധ്യതയുണ്ടെന്നും കേന്ദ്ര കാലാവസ്ഥ നിരീക്ഷണ കേന്ദ്രം അറിയിച്ചു.
ഇന്ന് മുതൽ ഫെബ്രുവരി 4 വരെ ദക്ഷിണേന്ത്യൻ സംസ്ഥാനങ്ങളിൽ ശക്തമായ മഴക്കും മഞ്ഞുവീഴ്ചക്കും സാധ്യതയുണ്ട്. മഞ്ഞുവീഴ്ച ആരംഭിച്ചിരിക്കുന്നതിനാൽ സംസ്ഥാനങ്ങൾ അതീവ ജാഗ്രത പാലിക്കണം. ജമ്മു കശ്മീർ, ഹിമാചൽ പ്രദേശ്, ഉത്തരാഖണ്ഡ് സംസ്ഥാനങ്ങളിലെ ഉയർന്ന പ്രദേശങ്ങളിൽ ശക്തമായ മഞ്ഞുവീഴ്ചയ്ക്ക് സാധ്യതയുള്ളതിനാൽ പ്രദേശങ്ങളിലെ ജനങ്ങൾക്ക് ആവശ്യമായ ജാഗ്രതാ മുന്നറിയിപ്പുകൾ നൽകണമെന്നും കേന്ദ്ര കാലാവസ്ഥാ നിരീക്ഷണ കേന്ദ്രം അറിയിച്ചു.
