നിരാശ എന്ന ആശയം ഏത് രൂപത്തിലും ഒരു വ്യക്തിയെയും സമൂഹത്തെയും ബാധിക്കുകയും വ്യാപിക്കുകയും ചെയ്യാം.ശുഭാപ്തി വിശ്വാസം പാടെ തകരുകയും തങ്ങളുടെ കടും പിടിത്തങ്ങൾക്ക് യാതൊരു ഭാവിയും ഇല്ലെന്നു തോന്നുകയും ചെയ്യുമ്പോൾ നിരാശ കൂടുതൽ ബാധിക്കും. ഇനി ശുഭകരമായതൊന്നും സംഭവിക്കാനില്ലെന്ന് തോന്നുന്നിടത്ത് നിരാശ നമ്മളെ തോല്‍പ്പിക്കും. കൂടുതൽ പോസിറ്റിവായി ചിന്തിച്ച് പ്രതീക്ഷയോടെ കാത്തിരിക്കുകയും ക്ഷമയോടെ പരിശ്രമിക്കുകയും ചെയ്താല്‍ നിരാശയെ മറികടക്കാനാകും.
ബിസിനസ്സിലെ തകര്‍ച്ച, ഗുരുതര രോഗബാധ, അപ്രതീക്ഷിത പരാജയങ്ങള്‍, പ്രണയബന്ധങ്ങളിലെ തകര്‍ച്ച, .ജീവിതപങ്കാളിയില്‍നിന്ന് നേരിടേണ്ടിവരുന്ന ദുരനുഭവങ്ങള്‍, എന്നിങ്ങിനെ പല കാരണങ്ങള്‍കൊണ്ട് ആളുകള്‍ നിരാശയുടെ കെണിയില്‍ വീഴാറുണ്ട്.
എതിരാളിയുടെ വൻ വിജയമോ , എതിരാളി വിജയിക്കുമെന്ന തോന്നലോ ഒരാളിലോ ഒരു കൂട്ടം ആളുകളിലോ നിരാശയും പരാജയ ഭീതിയും സൃഷ്ടിക്കാറുണ്ട്. എതിരാളി എന്ത് നല്ലത് ചെയ്താലും നിരാശ തോന്നുക ഇക്കൂട്ടരുടെ പ്രധാന ലക്ഷണമാണ്.
ഇത്തരം തോന്നലുകൾ പ്രത്യക്ഷത്തിൽ പ്രശ്നം ഉണ്ടാക്കുന്നില്ല എങ്കിലും ഇവ നീണ്ടുനില്‍ക്കുമ്പോള്‍ മാനസികാരോഗ്യത്തെയും പെരുമാറ്റത്തെയും ചിന്തകളെത്തന്നെയും നെഗറ്റീവായി സ്വാധീനിക്കുന്നു.
ഒരു വ്യക്തിയുടെ പ്രവര്‍ത്തനോര്‍ജത്തെ നിരാശ കാര്‍ന്നുതിന്നുന്നു. ചിന്തകൾക്ക് ഒരു വ്യക്തിയെ പോസിറ്റീവായോ നെഗറ്റീവായോ ചലിപ്പിക്കാന്‍സാധിക്കും. പോസിറ്റീവ് ചിന്തകൾ പോസിറ്റീവ് റിസള്‍ട്ടിലേക്ക് നയിക്കുമ്പോള്‍ നെഗറ്റീവ് ചിന്തകൾ പ്രവര്‍ത്തനമേഖലയില്‍ പരാജയത്തിലേക്കും നിശ്ചലതയിലേക്കും നയിക്കും.
നിരാശയുടെ കാരണം തിരിച്ചറിയുക എന്നതാണ് രക്ഷപെടാനുള്ള ആദ്യത്തെ പടി. എന്തിനെയും നിരാശാജനകം എന്ന് വിശേഷിപ്പിക്കാതെ ജീവിതത്തില്‍ ഇനി ശുഭകരമായത് സംഭവിക്കുകയില്ലെന്ന നിരാശയുടെ അടിസ്ഥാന കാരണം ഒഴിവാക്കി ശീലിക്കുക.
മനസ്സ് എതിർ വശത്ത് ശത്രുവായി പ്രതിഷ്ഠിക്കുന്ന ആളുകൾ, ജനക്കൂട്ടം, തുടങ്ങിയവ ചെയ്യുന്ന നല്ലകാര്യങ്ങൾ അംഗീകരിക്കാനുള്ള മനസ്സ് വളർത്തിയെടുക്കുക ആണ് ആദ്യം വേണ്ടത്. അതിനു പിന്നാലെ ഒരു പുതിയ സ്ളേറ്റിൽ നിന്നും നിങ്ങളുടെ പ്രവർത്തനങ്ങൾ തുടങ്ങുക.
മനസ്സിന്റെ നവീകരണമാണ് നിരാശയില്‍ നിന്ന് പുറത്ത് കടക്കാനുള്ള ഒരു മാർഗ്ഗം .ജീവിതത്തില്‍ കഴിഞ്ഞകാലത്ത് സംഭവിച്ച മോശം അനുഭവങ്ങള്‍ ഇടയ്‌ക്കിടെ അയവിറക്കാതിരിക്കുക. ബന്ധങ്ങളിലെ തകര്‍ച്ചയുടെയും പരാജയങ്ങളുടെയും കാരണങ്ങള്‍ സത്യസന്ധമായി വിലയിരുത്തുക. ജനങ്ങളുടെ അംഗീകാരം നേടാനാവുന്നില്ല എങ്കിൽ നമ്മുടെ ഭാഗത്തെ പോരായ്മകള്‍ തിരുത്താന്‍ ശ്രമിക്കുക. മനസ്സില്‍നിന്ന് ഈഗോ, വാശി എന്നിവ നീക്കുക. ഏത് പ്രതിസന്ധിയിലും ശുഭപ്രതീക്ഷ നിലനിര്‍ത്തുക. ഇപ്പോഴത്തെ അവസ്ഥകള്‍ താത്കാലികമാണെന്നും അതിനുശേഷം നല്ല ദിവസം വരുമെന്നും ചിന്തിക്കുക. ധ്യാനം, യോഗ, പ്രാര്‍ഥന, സംഗീതം കേള്‍ക്കല്‍ എന്നിവയ്‌ക്ക് സമയം കണ്ടെത്തുക.
ഇവയൊക്കെ സ്ഥിരമായി ചെയ്‌താൽ ഇപ്പോൾ ഉള്ള നിരാശയിൽ നിന്ന് പതിയെ പുറത്തുകടക്കാം. ഓർക്കുക, നിരാശയിൽ നിന്നും പുറത്തുകടക്കാൻ ബോധപൂർവ്വമായ ശ്രമം ആവശ്യമാണ്. അത് മറക്കാതിരിക്കുക.
