ന്യൂഡൽഹി: ഡൽഹിയിൽ നിന്നും അയോദ്ധ്യയിലേക്കുള്ള പ്രത്യേക ട്രെയിൻ ഡൽഹി ബിജെപി അദ്ധ്യക്ഷൻ വീരേന്ദ്ര സച്ദേവ ഫ്ളാഗ് ഓഫ് ചെയ്തു. ഡൽഹിയിലെ ഹസ്രത്ത് നിസാമുദ്ദീൻ റെയിൽവേ സ്റ്റേഷനിൽ നിന്നാണ് ട്രെയിൻ പുറപ്പെട്ടത്. ബിജെപി എംപി ഹർഷ വർദ്ധനും ചടങ്ങിൽ പങ്കെടുത്തു.
ഡൽഹിയിൽ നിന്നും 1,400 ഓളം ഭക്തരാണ് അയോദ്ധ്യയിലേക്ക് പുറപ്പെട്ടത്. ജയ് ശ്രീറാം എന്ന് ഉച്ചത്തിൽ ഉരുവിട്ടുകൊണ്ട് ഭക്തർ സ്റ്റേഷനിൽ നിന്നും ട്രെയിൻ കയറി. ഭഗവാൻ ശ്രീരാമന്റെ ഭക്തർ വളരെ സന്തുഷ്ടരാണെന്ന് വീരേന്ദ്ര സച്ദേവ പറഞ്ഞു. എല്ലാവരും പ്രധാനമന്ത്രി നരേന്ദ്രമോദിക്ക് നന്ദി പറയുകയാണ്. ഭക്തർക്ക് യാത്രാസൗകര്യം ഉൾപ്പെടെ വിവിധ സജ്ജീകരണങ്ങൾ ഒരുക്കി നൽകിയതിന് പ്രധാനമന്ത്രിക്കും റെയിൽവേ മന്ത്രാലയത്തിനും നന്ദി അറിയിക്കുന്നുവെന്ന് അദ്ദേഹം കൂട്ടിച്ചേർത്തു.
അയോദ്ധ്യ രാമക്ഷേത്രത്തിലേക്ക് പോകുന്ന ഭക്തരുടെ ആദ്യ സംഘം ആസ്ത സ്പെഷ്യൽ എന്ന മറ്റൊരു ട്രെയിനിൽ ഡൽഹിയിൽ നിന്നും പുറപ്പെട്ടിരുന്നു. രാജ്യത്തെ എല്ലാ വിശ്വാസികളും വളരെ സന്തോഷത്തിലാണെന്നും രാംലല്ലയെ ദർശിക്കാൻ അവസരം ലഭിക്കുന്നത് തങ്ങളുടെ ഭാഗ്യമാണെന്നും ഭക്തർ പ്രതികരിച്ചു.