ആശുപത്രിയിൽ പോയാൽ പലപ്പോഴും ഡോക്ടർമാർ പറയുന്ന കാര്യങ്ങളിലൊന്നാണ് ഹീമോഗ്ലാബിന്റെ കുറവ്. രക്താണുക്കളുടെ കുറവ് മൂലം നിരവധി രോഗങ്ങളാണ് നമ്മെ പിടിമുറുക്കുന്നത്. അപ്പോൾ ഹീമോഗ്ലാബിന്റെ അളവ് എങ്ങനെ വർദ്ധിപ്പിക്കും? അതിനായി ഭക്ഷണ കാര്യങ്ങളിൽ തന്നെ ചില മാറ്റങ്ങൾ വരുത്തിയാൽ ഈ പ്രശ്നം നമുക്ക് എളുപ്പത്തിൽ പരിഹരിച്ചെടുക്കാവുന്നതാണ്. ഇനി പറയുന്ന ആഹാര വസ്തുക്കൾ ഭക്ഷണത്തിൽ ഉൾപ്പെടുത്താൻ ശ്രമിച്ചോളൂ..
പാലക്ക് ചീര
ധാരാളം ഇരുമ്പ് അടങ്ങിയ ഭക്ഷണമാണ് പാലക് ചീര. ചുവന്ന രക്താണുക്കളുടെ ഉത്പാദനത്തിന് സഹായിക്കുന്ന ഈ ഇലവർഗം ഭക്ഷണത്തിൽ ഉൾപ്പെടുത്തി കഴിക്കാൻ ശ്രമിക്കുക.
പയറുവർഗങ്ങൾ
പ്രോട്ടീൻ ധാരാളം അടങ്ങിയിരിക്കുന്ന പയറുവർഗങ്ങൾ ഹീമോഗ്ലാബിന്റെ അളവ് വർദ്ധിപ്പിക്കാനും സഹായിക്കുന്നു. പയറു വർഗങ്ങളിൽ ഇരുമ്പ് ധാരാളം അടങ്ങിയിട്ടുള്ളതിനാൽ പേശിയുടെ ആരോഗ്യം വർദ്ധിപ്പിക്കാൻ സഹായിക്കുന്നു. കടല, പരിപ്പ്, ചെറുപയർ എന്നീ പയറവർഗങ്ങൾ ഭക്ഷണത്തിൽ ഉൾപ്പെടുത്തി കഴിക്കാൻ ശ്രമിക്കുക.
അത്തിപഴം
ശരീരത്തിലേക്ക് ആവശ്യമായ ഇരുമ്പ് പ്രദാനം ചെയ്യുന്നതിന് ഡ്രൈഡ് അത്തിപഴം കഴിക്കാവുന്നതാണ്. ചുവന്ന രക്താണുക്കളുടെ അളവ് ഇതിലൂടെ വർദ്ധിക്കുകയും വിളർച്ച പോലുള്ള രോഗങ്ങളെ തടഞ്ഞു നിർത്താൻ സഹായിക്കുകയും ചെയ്യുന്നു.
മത്തങ്ങാ വിത്തുകൾ
മഗ്‌നീഷ്യം, സിങ്ക് തുടങ്ങിയ ധാതുക്കൾ അടങ്ങിയതാണ് മത്തങ്ങാ വിത്തുകൾ. ഇവ വറുത്തെടുത്ത് കഴിക്കുകയോ ഉണക്കി പൊടിച്ച് കഴിക്കുകയോ ചെയ്യുന്നത് ശരീരത്തിനാവശ്യമായ പോഷക ഘടകങ്ങൾ പ്രദാനം ചെയ്യുന്നു.
