ന്യൂഡൽഹി : ലക്ഷദ്വീപ് ദ്വീപുകളുടെ വിനോദസഞ്ചാര സാധ്യതകൾ പ്രയോജനപ്പെടുത്താൻ ഇന്ത്യ. ദ്വീപുകളുടെ കണക്റ്റിവിറ്റി ശക്തിപ്പെടുത്തുന്നതിന്, ലക്ഷദ്വീപിലെ അഗത്തി ദ്വീപിലേക്കുള്ള ഫ്ലൈറ്റ് ഓപ്പറേഷനുകൾക്ക് ആവശ്യമായ അനുമതികൾ സ്പൈസ് ജെറ്റിനും ഫ്ലൈ 19 നും ഇതിനകം നൽകി കഴിഞ്ഞു.
അതിനിടെ, ഇൻഡിഗോ എയർലൈൻസിന്റെ ഒരു സംഘം ബുധനാഴ്ച ദ്വീപ് ഭരണകൂടവുമായി കൂടിക്കാഴ്ച നടത്തി, ഫ്ലൈറ്റ് ആരംഭിക്കാൻ താൽപ്പര്യം പ്രകടിപ്പിച്ചു. ഈ മാസം അവസാനത്തോടെ ഫ്ലൈ 19 പ്രവർത്തനം ആരംഭിക്കും .
നിലവിൽ, അലയൻസ് എയർലൈൻസ് അഗത്തി ദ്വീപിലേക്ക് ബുധൻ, ഞായർ ദിവസങ്ങളിൽ പ്രതിദിന ഫ്ലൈറ്റ് നടത്താറുണ്ട് . കൊച്ചിക്കും കവരത്തിക്കുമിടയിൽ ഒരാഴ്ചയ്ക്കുള്ളിൽ ഒരു കപ്പൽ സർവീസ് മാത്രമാണുള്ളത്. പ്രവർത്തനം ആരംഭിക്കാൻ കൂടുതൽ എയർലൈനുകൾ അണിനിരക്കുന്നതിനാൽ, അഗത്തി ദ്വീപ് വിമാനത്താവളം വലിയ വിപുലീകരണത്തിന് ഒരുങ്ങുകയാണ്.
റൺവേ 2,800 മീറ്ററായി നീട്ടുന്ന വിപുലീകരണ പ്രവർത്തനങ്ങൾക്കായി 4,500 കോടി രൂപയ്ക്ക് നിർമാണ കമ്പനിയായ ലാർസൻ ആൻഡ് ടൂബ്രോ (എൽ ആൻഡ് ടി) കരാർ അനുവദിക്കുകയും ചെയ്തു. അഗത്തി വിമാനത്താവളത്തിന്റെ വിപുലീകരണത്തിനായി സ്വകാര്യ ഭൂമി ഏറ്റെടുക്കുകയും ചെയ്യും .
അഗത്തിക്ക് പുറമെ, ലക്ഷദ്വീപിന്റെ തെക്കേ അറ്റത്തുള്ളതും മാലദ്വീപിനോട് ചേർന്നുള്ളതുമായ മിനിക്കോയ് ദ്വീപിൽ മറ്റൊരു ഗ്രീൻഫീൽഡ് വിമാനത്താവളം വികസിപ്പിക്കും.കണക്ടിവിറ്റി ഭാഗം പൂർത്തിയായിക്കഴിഞ്ഞാൽ, അടുത്ത ഘട്ടം സന്ദർശിക്കുന്ന വിനോദസഞ്ചാരികൾക്ക് കൂടുതൽ മുറികൾ നൽകുക എന്നതാണ്. ടാറ്റ ഗ്രൂപ്പ് ഇതിനകം മോദി സർക്കാരിന് പിന്തുണ നൽകി കൊണ്ട് സുഹേലി, മിനിക്കോയ്, കദ്മത്ത് ദ്വീപുകളിൽ മൂന്ന് പ്രധാന താജ് റിസോർട്ടുകൾ തുടങ്ങാൻ പദ്ധതിയിട്ടിട്ടുണ്ട് . . ഇതിൽ സുഹേലിക്കും കദ്മത്തിനും ജില്ലാ ഭരണകൂടം പച്ചക്കൊടി കാട്ടിയിട്ടുണ്ട്.ശരിയായ പാരിസ്ഥിതിക ആഘാത വിലയിരുത്തലിന് ശേഷമാണ് ഈ പദ്ധതികൾക്കെല്ലാം അനുമതി നൽകിയത്.
