പുതുവർഷാരംഭത്തിൽ കേരളത്തിലെ തീയേറ്ററുകളിൽ സൂപ്പർ ഹിറ്റായി മാറിയ ചിത്രമായിരുന്നു ഓസ്ലർ. മിഥുൻ മാനുവൽ തോമസിന്റെ സംവിധാനത്തിൽ മമ്മൂട്ടിയും ജയറാമും പ്രധാന വേഷങ്ങളിൽ എത്തിയ ചിത്രം ഒരു മെഡിക്കൽ ത്രില്ലർ ആയിരുന്നു. ഇപ്പോഴിതാ ചിത്രത്തിന്റെ കളക്ഷൻ വിവരങ്ങൾ പുറത്തുവിട്ടിരിക്കുകയാണ് അണിയറ പ്രവർത്തകർ.
ജനുവരി 11 ന് തീയേറ്ററുകളിൽ എത്തിയ ചിത്രം ആഗോള കളക്ഷനായി നേടിയത് 40 കോടിയോളമാണ്. അതേസമയം ഓസ്ലറിന്റെ കേരളാ ബോക്സ് ഓഫീസ് കളക്ഷൻ 22. 64 കോടിയാണ്. ഇപ്പോഴും പ്രദർശനം തുടരുന്ന ചിത്രം കഴിഞ്ഞ രണ്ട് ആഴ്ചകളിലായി മികച്ച കളക്ഷൻ നേടിയതായാണ് ട്രേഡ് അനലിസ്റ്റുകൾ റിപ്പോർട്ട് ചെയ്യുന്നത്. നിലവിലെ റിപ്പോർട്ടുകൾ പ്രകാരം മികച്ച ഓപ്പണിംഗ് ഡേ കളക്ഷൻ പട്ടികയിൽ രണ്ടാം സ്ഥാനത്താണ് ഓസ്ലർ.
ചിത്രത്തിന് മികച്ച വരവേൽപ്പാണ് പ്രേക്ഷകർ നൽകിയത്. ഒരു ഇടവേളയ്‌ക്ക് ശേഷം മമ്മൂട്ടിയും ജയറാമും ഒന്നിച്ച ചിത്രം കൂടിയായിരുന്നു ഓസ്ലർ. അഞ്ചാം പാതിരയ്‌ക്ക് ശേഷം മിഥുൻ മാനുവൽ തോമസ് സംവിധാനം ചെയ്ത ചിത്രത്തിന്റെ തിരക്കഥ എഴുതിയത് ഡോ. രൺധീർ കൃഷ്ണയാണ്. അനശ്വര രാജൻ, ജഗദീഷ്, അർജുൻ അശോകൻ തുടങ്ങി ഒട്ടനവധി താരങ്ങളും അണിനിരന്നിരുന്നു.
അതേസമയം ചിത്രത്തിന്റെ ഒടിടി റിലീസ് സംബന്ധിച്ച വാർത്തകളും പുറത്തുവരുന്നുണ്ട്. ഫെബ്രുവരി അവസാന വാരത്തോടെ ചിത്രം ഒടിടിയിൽ എത്തുമെന്നാണ് വിവരം. പ്രമുഖ ഒടിടി പ്ലാറ്റ്ഫോമായ ആമസോൺ പ്രൈമിലൂടെയായിരിക്കും ചിത്രം സ്ട്രീമിംഗ് ആരംഭിക്കുന്നതെന്നും റിപ്പോർട്ടുകൾ പുറത്തുവരുന്നുണ്ട്.
