തിരുവനന്തപുരം: രഞ്ജി ട്രോഫിയില്‍ കേരളത്തിനായി ഏറ്റവും അധികം മത്സരങ്ങൾ കളിച്ച രോഹൻ പ്രേം വിരമിക്കൽ പ്രഖ്യാപിച്ചു. തുടർന്നും ആഭ്യന്തര ക്രിക്കറ്റിൽ തുടരുമെന്ന് അറിയിച്ചിട്ടുള്ള താരം ഇനി കേരളത്തിനായി കളിക്കില്ലെന്ന് വ്യക്തമാക്കിയിട്ടുണ്ട്. മറ്റ് സംസ്ഥാനങ്ങൾ അവസരം നൽകിയാൽ അവർക്ക് വേണ്ടി പാഡണിയുമെന്നും താരം വ്യക്തമാക്കി. കെ.എന്‍.അനന്തപദ്മനാഭന്റെ റെക്കോര്‍ഡ് തകർത്ത് രഞ്ജിയിൽ കേരളത്തിനായി കൂടുതൽ മത്സരങ്ങൾ കളിക്കുന്ന താരമായിരുന്നു രോഹൻ പ്രേം. 36ാം വയസില്‍ 88 മല്‍സരങ്ങളെന്ന അനന്തപദ്മനാഭന്റെ റെക്കോര്‍‍ഡാണ് താരം മറികടന്നത്.
2005 ഡിസംബറില്‍ അജയ് ജഡേജ നയിച്ച രാജസ്ഥാനെതിരെയായിരുന്നു രോഹന്റെ രഞ്ജി അരങ്ങേറ്റം. രഞ്ജിയില്‍ കൂടുതല്‍ റണ്‍സ് നേടിയ കേരള താരം, കൂടുതല്‍ സെഞ്ച്വറികള്‍, അണ്ടര്‍ 20 ഫോര്‍മാറ്റില്‍ കേരളത്തിനായി ആയിരം റണ്‍സ് തികയ്‌ക്കുന്ന ആദ്യ താരം എന്നിങ്ങനെ നിരവധി റെക്കോർഡുള്ള താരം രോഹിത് ശര്‍മയ്‌ക്കൊപ്പം ഇന്ത്യന്‍ അണ്ടര്‍ 19 ടീമിൽ കളിച്ചിട്ടുണ്ട്.
ഫസ്റ്റ് ക്ലാസ് ക്രിക്കറ്റില്‍ 100 മത്സരം തികയ്‌ക്കാനും രോഹന്‍ പ്രേമിനായി.ട്വന്റി 20-യില്‍ കേരളത്തിനായി 1000 റണ്‍സ് നേടിയ ആദ്യ ബാറ്ററും രോഹനാണ്. 101 മത്സരത്തിൽ നിന്ന് 5,476 റൺസും 53 വിക്കറ്റും നേടിയിട്ടുണ്ട്. 208 ആണ് ഉയർന്ന സ്കോർ. 63 ലിസ്റ്റ് എ മത്സരങ്ങളും 57 ട്വന്റി20 മത്സരങ്ങളിലും കേരളത്തിനായി കളിച്ചു.
