ന്യൂഡൽഹി: രാഷ്ട്രീയ ലോക്ദൾ (ആർഎൽഡി) ബിജെപിയുടെ നേതൃത്വത്തിലുള്ള എൻഡിഎയുടെ ഭാഗമാകുമെന്ന് സ്ഥിരീകരിച്ച് പാർട്ടി അദ്ധ്യക്ഷൻ ജയന്ത് ചൗധരി. പാർട്ടിയിലെ എല്ലാവരോടും ആലോചിച്ച ശേഷമെടുത്ത ഏകകണ്ഠമായ തീരുമാനമാണിതെന്നും ജയന്ത് ചൗധരി വ്യക്തമാക്കി. പ്രതിപക്ഷ സഖ്യമായ ഇൻഡി മുന്നണിക്ക് കനത്ത തിരിച്ചടിയാണ് ആർഎൽഡിയുടെ നീക്കം.
” പാർട്ടിയിലെ എല്ലാ എംഎൽഎമാരോടും പ്രവർത്തകരോടും സംസാരിച്ചതിന് ശേഷമാണ് ഈ തീരുമാനമെടുത്തത്. രാജ്യത്തിന് വേണ്ടിയും ജനങ്ങൾക്ക് വേണ്ടിയും എന്തെങ്കിലും നല്ല കാര്യങ്ങൾ ചെയ്യാൻ ആഗ്രഹിക്കുന്നുവെന്നും” ജയന്ത് ചൗധരി പറഞ്ഞു. തന്റെ മുത്തച്ഛനും മുൻ പ്രധാനമന്ത്രിയുമായ ചൗധരി ചരൺ സിങ്ങിന് മരണാനന്തര ബഹുമതിയായി ഭാരതരത്ന നൽകി ആദരിച്ചതിൽ ജയന്ത് ചൗധരി പ്രധാനമന്ത്രിക്ക് നന്ദി അറിയിച്ചിരുന്നു. ‘മുൻ സർക്കാരുകൾക്ക് ചെയ്യാൻ കഴിയാത്തത് പ്രധാനമന്ത്രി നരേന്ദ്രമോദിക്ക് സാധിച്ചു. ഈ പുരസ്കാരം ഞങ്ങളുടെ കുടുംബത്തിലോ പാർട്ടിയിലോ ഒതുങ്ങുന്നില്ല. ഓരോ കർഷകനും യുവാക്കൾക്കും അഭിമാന നിമിഷമാണിതെന്നും’ ജയന്ത് ചൗധരി പറഞ്ഞു.
അതേസമയം ഉത്തർപ്രദേശിൽ ഭാരത് ജോഡോ ന്യായ് യാത്രയുടെ ദിവസങ്ങൾ വെട്ടിച്ചുരുക്കാൻ കോൺഗ്രസ് പദ്ധതി ഇടുകയാണെന്നും, ആർഎൽഡിക്ക് സ്വാധീനമുള്ള പടിഞ്ഞാറൻ യുപിയുടെ ഭാഗങ്ങൾ ഒഴിവാക്കുമെന്നും കഴിഞ്ഞ ദിവസം റിപ്പോർട്ടുകൾ പുറത്ത് വന്നിരുന്നു. ആർഎൽഡി എൻഡിഎയുടെ ഭാഗമാകുമെന്ന സൂചനകൾ പുറത്ത് വന്നതിന് പിന്നാലെയായിരുന്നു കോൺഗ്രസിന്റെ നീക്കം.