ന്യൂഡൽഹി: കാര്യഗൗരവമുള്ള വിഷയങ്ങളിന്മേൽ ചർച്ചകൾ നടത്തുന്ന ഒരേയൊരു രാഷ്‌ട്രീയ പാർട്ടിയാണ് ബിജെപിയെന്ന് പാർട്ടി ദേശീയ അദ്ധ്യക്ഷൻ ജെ പി നദ്ദ. ഡൽഹിയിലെ ഭാരത് മണ്ഡപത്തിൽ നടക്കുന്ന പാർട്ടിയുടെ ദ്വിദിന ദേശീയ കൺവെൻഷനിൽ സംസാരിക്കുകയായിരുന്നു അദ്ദേഹം. ഇത്രവലിയ വേദിയിൽ കാര്യഗൗരവമുള്ള രാഷ്‌ട്രീയ ചർച്ചകളാണ് നടക്കുന്നതെന്നും അദ്ദേഹം ചൂണ്ടിക്കാട്ടി.
” പ്രധാനമന്ത്രി നരേന്ദ്രമോദിക്ക് എനിക്ക് ഉറപ്പ് നൽകാൻ സാധിക്കണം. പ്രധാനമന്ത്രി നൽകിയ നിർദ്ദേശങ്ങൾ അടിസ്ഥാനതലം മുതൽ നടപ്പാക്കുമെന്ന് നിങ്ങൾ ഉറപ്പാക്കണം. നിങ്ങൾ ഓരോരുത്തരുടേയും പ്രവർത്തനത്തിലൂടെ അദ്ദേഹത്തിന് ഈ ഉറപ്പ് നൽകാൻ ഞാൻ ആഗ്രഹിക്കുന്നു. ലോക്‌സഭയിൽ 370 സീറ്റുകൾ കടക്കുക എന്ന ലക്ഷ്യത്തിലേക്കാണ് നമ്മൾ ഇപ്പോൾ മുന്നേറുന്നത്. ഇതിന് ഒറ്റക്കെട്ടായി നിൽക്കണം.
വലിയൊരു രാഷ്‌ട്രീയവേദിയാണ് നിങ്ങൾക്ക് മുന്നിലുള്ളത്. ഈ കൺവെൻഷനിൽ കാര്യഗൗരവമുള്ള ചർച്ചകൾ മാത്രമാണ് നടക്കുന്നത്. അത്തരത്തിലുള്ള ഒരേയൊരു രാഷ്‌ട്രീയ പാർട്ടിയാണ് ബിജെപി. ഇത് ബിജെപിയിൽ മാത്രമേ നിങ്ങൾക്ക് കാണാനാകൂ. കഴിഞ്ഞ പത്ത് വർഷത്തിനിടെ ശക്തമായ പ്രതിപക്ഷത്തിന്റെ സ്ഥാനം വഹിക്കുന്നതിൽ പരാജയപ്പെട്ടവരാണ് പ്രതിപക്ഷ സ്ഥാനത്തിരിക്കുന്നതെന്നും” അദ്ദേഹം പറഞ്ഞു.
