പൊതുവെ ചർമ്മ സംബന്ധമായ പ്രശ്നങ്ങൾക്കുള്ള ഒരു പ്രതിവിധിയായി നമ്മൾ ഉപയോഗിക്കുന്ന ഒന്നാണ് കറ്റാർ വാഴ. സൂര്യതാപം, ചുണങ്ങ്, മുഖക്കുരു, വരൾച്ച, മറ്റ് പ്രശ്നങ്ങൾ എന്നിവയ്‌ക്ക് ഉത്തമമാണ് ഇവ. കാറ്റാർ വാഴയുടെ ജെൽ സ്ഥിരമായി ഉപയോഗിച്ചാൽ എല്ലാ ചർമ്മ രോഗങ്ങളും ഇല്ലാതാകുമെന്ന് വിദഗ്ധർ പറയുന്നു. കറ്റാർ വാഴയുടെ ജെൽ കഴിക്കാമെന്നും കറ്റാർ വാഴ ജ്യൂസടിച്ച് കുടിക്കാമെന്നും ചിലർ പറയുന്നുണ്ട്. എന്നാൽ ഇതിനെ എതിർക്കുന്ന ആരോഗ്യ വിദഗ്ധരും കുറവല്ല. സത്യത്തിൽ കറ്റാർ വാഴ കഴിക്കാമോ? കഴിക്കാമെന്ന് പറയുന്നവരുടെ വാദം എന്താണ്? കഴിക്കരുത് എന്ന് പറയുന്നവരുടെ വാദം എന്താണ്?
കറ്റാർ വാഴ ജെല്ലും ജ്യൂസും കഴിക്കാമെന്ന് പറയുന്നവർ മുന്നോട്ട് വയ്‌ക്കുന്ന കാര്യങ്ങൾ,
1. ആൻ്റിഓക്‌സിഡൻ്റുകളാൽ സമ്പുഷ്ടമാണ് കറ്റാർ വാഴ.
2. ദഹനം മെച്ചപ്പെടുത്തുന്നു
3. വിറ്റാമിൻ സി നിറഞ്ഞിരിക്കുന്നു. ഇത് പ്രതിരോധ ശേഷി വർദ്ധിപ്പിക്കും
4. രക്തത്തിലെ പഞ്ചസാരയുടെ അളവ് നിയന്ത്രിക്കുന്നു. പ്രമേഹരോഗികൾക്ക് നല്ലതാണ് കറ്റാർ വാഴ ജ്യൂസ് കുടിക്കുന്നത്.
5. വായുടെ ആരോഗ്യത്തെ സംരക്ഷിക്കുന്നു.
കറ്റാർ വാഴ കഴിക്കരുതെന്ന് പറയുന്നവർ മുന്നോട്ട് വയ്‌ക്കുന്ന ചില നിർദ്ദേശങ്ങൾ,
1. കറ്റാർ വാഴയുടെ pH 4.4 ആണ്. കറ്റാർ വാഴ വെറും വയറ്റിൽ കഴിച്ചാൽ അസിഡിറ്റി ഉണ്ടാകും.
2. ഹെപ്പറ്റൈറ്റിസിന് കാരണമായേക്കാം. കാറ്റാർ വാഴ കഴിച്ചാൽ ചില ആളുകളിൽ ഹെപ്പറ്റൈറ്റിസ് എന്ന അസുഖം ഉണ്ടായേക്കാം.
3. കറ്റാർ വാഴ അമിതമായി ഉപയോഗിച്ചാൽ രക്തക്കുഴലുകളിൽ വീക്കം സംഭവിക്കുന്ന രോഗമായ വാസ്കുലിറ്റിസ് ചിലരിൽ ഉണ്ടായേക്കാം.
4. 2002-ൽ ഫുഡ് ആൻഡ് ഡ്രഗ് അഡ്മിനിസ്ട്രേഷൻ(FDA) കറ്റാർ വാഴ കഴിക്കുന്നത് കുറയ്‌ക്കണമെന്നും സുരക്ഷിതമല്ലെന്നും പറഞ്ഞിട്ടുണ്ട്.
5. ഡോക്ടറുടെ നിർദ്ദേശ പ്രകാരം അല്ലാതെ കറ്റാർ വാഴ കഴിക്കരുത്
ശ്രദ്ധിക്കുക
ചർമ്മത്തിൽ കറ്റാർ വാഴ ഉപയോഗിക്കുന്നതിൽ പ്രശ്നമില്ല. എന്നാൽ ആരെങ്കിലും പറയുന്നത് കേട്ട് അവനവന്റെ ആരോഗ്യ സ്ഥിതി മനസിലാക്കാതെ കറ്റാർ വാഴ കഴിക്കരുത്. പ്രത്യേകിച്ച് ഡോക്ടർമാരുടെ നിർദ്ദേശമില്ലാതെ. അതുകൊണ്ട് ഡോക്ടർമാർ നിർദ്ദേശിച്ചാൽ മാത്രം കറ്റാർ വാഴ കഴിക്കുക.
