പ്രശസ്ത സംവിധായകൻ നിതീഷ് തിവാരി സംവിധാനം ചെയ്യുന്ന രാമായണത്തിനായി കാത്തിരിക്കുകയാണ് ഇന്ത്യൻ സിനിമാ ലോകം. ചിത്രത്തിൽ രൺബീർ കപൂർ ആയിരിക്കും ശ്രീരാമന്റെ വേഷത്തിലെത്തുക. പ്രീപ്രൊഡക്ഷൻ ജോലികൾ പുരോഗമിക്കുന്ന ചിത്രത്തിന്റെ പുത്തൻ അപ്ഡേറ്റുകൾ പുറത്തുവന്നിരിക്കുകയാണ്.
ചിത്രത്തിന്റെ പ്രഖ്യാപനം ഉടൻ ഉണ്ടാകുമെന്നാണ് റിപ്പോർട്ടുകൾ. ഏപ്രിൽ 17 രാമനവമി ദിനത്തിലായിരിക്കും പ്രഖ്യാപനം. ജൂലൈ മാസത്തോടെ സിനിമയുടെ ചിത്രീകരണവും ആരംഭിക്കും. 2025 ദീപാവലി റിലീസായിട്ടായിരിക്കും ചിത്രം എത്തുക. സായ് പല്ലവിയാണ് ചിത്രത്തിൽ സീതയുടെ വേഷത്തിലെത്തുന്നത്. എന്നാൽ യാഷ് രാവണനായി എത്തുമോ എന്ന കാര്യത്തിൽ ഇതുവരെ ഔദ്യോഗിക സ്ഥിരീകരണങ്ങളായിട്ടില്ല.
അതേസമയം ചിത്രത്തിൽ ഹനുമാന്റെ വേഷത്തിൽ സണ്ണി ഡിയോൾ എത്തുമെന്നാണ് പുറത്തുവരുന്ന മറ്റൊരു വാർത്ത. കൈകേയിയായി ലാറാ ദത്തയും ശൂർപ്പണകയായി രാകുൽ പ്രീതും അഭിനയിക്കുമെന്നാണ് വിവരങ്ങൾ. മികച്ച സാങ്കേതിക വിദ്യ ഉപയോഗിച്ച് അണിയിച്ചൊരുക്കുന്ന ചിത്രം മുംബൈയിലും ലോസ് ഏഞ്ചലസിലുമായിട്ടാകും ചിത്രീകരിക്കുക.
മൂന്ന് ഭാഗങ്ങളായിട്ടാണ് ചിത്രം ഒരുങ്ങുന്നത്. ആദ്യഭാഗത്തിൽ ശ്രീരാമകഥയും രണ്ടാംഭാഗത്തിൽ രാവണന്റെയും സീതയുടെയും കഥയും പറയും. മൂന്നാം ഭാഗത്തിൽ ഹനുമാനെ കേന്ദ്രീകരിച്ചായിരിക്കും കഥ. ഒപ്പം യുദ്ധഭാഗങ്ങളും ഉൾപ്പെടുത്തിയേക്കും. സിനിമയുടെ തിരക്കഥ പൂർത്തിയാക്കാൻ സംവിധായകൻ അഞ്ച് വർഷത്തോളം സമയമെടുത്തെന്നാണ് റിപ്പോർട്ടുകൾ.