വെട്രിമാരന്റെ സംവിധാനത്തിൽ വരാനിരിക്കുന്ന ഏറ്റവും പുതിയ ചിത്രമാണ് വാടിവാസൽ. ചിത്രത്തിൽ സൂര്യ നായകനായി എത്തുമെന്നായിരുന്നു നേരത്തെ പുറത്തുവന്ന വിവരങ്ങൾ. ജല്ലിക്കെട്ടിനെ അടിസ്ഥാനമാക്കി ഒരുങ്ങുന്ന ചിത്രത്തിന്റെ ഒരു ഗ്ലിംപ്‌സ് വീഡിയോയും നേരത്തെ പുറത്തുവന്നിരുന്നു. ഒരു വർഷം മുമ്പാണ് ചിത്രത്തിന്റെ പ്രഖ്യാപനം നടന്നത്. എന്നാൽ സൂര്യയും വെട്രിമാരനും മറ്റ് സിനിമകളുടെ തിരക്കുകളിലേക്ക് പോയതിനാൽ ചിത്രം നീണ്ടുപോവുകയായിരുന്നു.
അടുത്തിടെ ചിത്രത്തിൽ നിന്ന് സൂര്യ പിന്മാറി എന്ന തരത്തിൽ വാർത്തകൾ പ്രചരിച്ചിരുന്നു. ഇക്കാര്യം ശരിവക്കുന്ന തരത്തിലുള്ള വാർത്തകളാണ് പുറത്തുവരുന്നത്. വാടിവാസലിൽ നിന്ന് സൂര്യ പിന്മാറിയെന്നും പകരം ചിത്രത്തിൽ സൂരി നായകനാകും എന്നാണ് റിപ്പോർട്ടുകൾ. നിലവിൽ വിടുതലൈ 2 ന്റെ ചിത്രീകരണം പുരോഗമിച്ചുകൊണ്ടിരിക്കുകയാണ്. ചിത്രത്തിൽ വിജയ് സേതുപതിക്കൊപ്പം സൂരിയും പ്രധാന വേഷത്തിൽ എത്തുന്നുണ്ട്. വിടുതലൈ ഒന്നാം ഭാഗത്തിൽ പോലീസ് വേഷത്തിലെത്തിയ സൂരി ത്രസിപ്പിക്കുന്ന പ്രകടനമാണ് കാഴചവച്ചത്.
വിടുതലൈ പൂർത്തിയായാൽ ഉടൻ തന്നെ വാടിവാസലിന്റെ ചിത്രീകരണം ആരംഭിക്കുമെന്ന് വെട്രിമാരൻ നേരത്തെ അറിയിച്ചിരുന്നു. ഈ വർഷം അവസാനത്തോടെ വാടിവസൽ ഷൂട്ടിംഗ് ആരംഭിക്കാനാണ് സംവിധായകൻ പദ്ധതിയിടുന്നത്. ചിത്രം 2025 ൽ തിയേറ്ററുകളിൽ എത്തുമെന്നും റിപ്പോർട്ടുകൾ ഉണ്ട്. അതേസമയം സൂര്യനായകനായി റിലീസിന് തയ്യാറെടുത്തുകൊണ്ടിരിക്കുന്ന ചിത്രമാണ് കങ്കുവ. സുധാ കൊങ്ങര സംവിധാനം ചെയ്യുന്ന ചിത്രത്തിലായിരിക്കും സൂര്യ അടുത്തതായി അഭിനയിക്കുക. പുതിയ ചിത്രങ്ങളുടെ തിരക്കുകൾക്കിടയിൽ വാടിവാസലിന് ഡേറ്റ് ക്ലാഷ് ഉണ്ടാകാൻ സാധ്യത ഉള്ളതിനാലും ചിത്രത്തിൽ നിന്ന് സൂര്യ പിന്മാറും എന്ന് തമിഴ് സിനിമാ മാദ്ധ്യമങ്ങൾ റിപ്പോർട്ട് ചെയ്യുന്നു.
