തെന്നിന്ത്യൻ സിനിമാ പ്രേമികൾ വളരെ അധികം ആവേശത്തോടെ കാത്തിരിക്കുന്ന ചിത്രമാണ് തഗ് ലൈഫ്. നായകൻ എന്ന ചിത്രത്തിന് ശേഷം കമലഹാസനും മണിരത്‌നവും വീണ്ടും ഒരുമിക്കുന്നു എന്ന പ്രത്യേകതയും ചിത്രത്തിനുണ്ട്. മലയാളത്തിൽ നിന്ന് ദുൽഖർ സൽമാൻ, ജോജു ജോർജ്, ഐശ്വര്യ ലക്ഷ്മി എന്നിവരും ചിത്രത്തിൽ പ്രധാന വേഷങ്ങളിൽ എത്തുമെന്ന വാർത്ത നേരത്തെ പുറത്തുവന്നിരുന്നതാണ്.
ഇപ്പോഴിതാ ചിത്രത്തിൽ നിന്ന് ദുൽഖർ സൽമാൻ പിൻമാറി എന്ന വാർത്തയാണ് പുറത്തുവരുന്നത്. എന്നാൽ ഇക്കാര്യത്തിൽ ഔദ്യോഗിക സ്ഥിരീകരണങ്ങൾ ഒന്നും അണിയറ പ്രവർത്തകർ നൽകിയിട്ടില്ല. ഒന്നിലധികം സിനിമകളുടെ തിരക്കിലാണ് ദുൽഖർ സൽമാൻ. അതിനാലാണ് തഗ് ലൈഫിൽ നിന്ന് പിന്മാറിയതെന്നാണ് പുറത്തുവരുന്ന വാർത്തകൾ.
തഗ് ലൈഫിൽ ജില്ലാ കളക്ടറുടെ വേഷത്തിലാണ് ദുൽഖർ സൽമാൻ അഭിനയിക്കേണ്ടിയിരുന്നത്. ദുൽഖർ ചിത്രത്തിൽ നിന്ന് പിന്മാറിയതോടെ ഈ വേഷത്തിനായി അണിയറ പ്രവർത്തകർ ചിമ്പുവിനെ സമീപിച്ചെന്നും തമിഴ് സിനിമാ മാദ്ധ്യമങ്ങൾ റിപ്പോർട്ടുചെയ്യുന്നു. എന്നാൽ ഏറ്റെടുത്ത സിനിമകളുടെ തിരക്കായതിനാൽ ചിമ്പുവും ഈ വേഷം നിരസിച്ചതായാണ് വിവരം.
രാജ്കമൽ ഫിലിംസ് ഇന്റർനാഷണൽ, മദ്രാസ് ടാക്കീസ്, റെഡ് ജയന്റ് മൂവീസ്, ആർ.മഹേന്ദ്രൻ, ശിവ അനന്ത് എന്നിവർ ചേർന്നാണ് ചിത്രത്തിന്റെ നിർമ്മാണം. ജയം രവി, തൃഷ, ഗൗതം കാർത്തിക്ക് എന്നിവരും ചിത്രത്തിലെ അഭിനേതാക്കളാണ്. മണിരത്‌നത്തിനൊപ്പം സംഗീതസംവിധായകൻ എ.ആർ റഹ്‌മാനും എഡിറ്റർ ശ്രീകർ പ്രസാദും വീണ്ടും ഒന്നിക്കുന്നു.
