കേദാർനാഥ്: കേദാർനാഥ് ക്ഷേത്രം മെയ് 10 ന് രാവിലെ 7 മണിക്ക് ഭക്തർക്കായി തുറക്കുമെന്ന് ബദരീനാഥ്-കേദാർനാഥ് ക്ഷേത്ര കമ്മിറ്റി (ബികെടിസി) അറിയിച്ചു. മെയ് 6 ന് ആചാരപരമായ പഞ്ച്മുഖി ഡോളി പുറപ്പെടുന്നതോടെ തീർത്ഥാടനം ആരംഭിക്കും. മെയ് 9 ന് വൈകുന്നേരം ഈ യാത്ര കേദാർനാഥ് ധാമിൽ എത്തും.
ബദരീനാഥ്-കേദാർനാഥ് ക്ഷേത്ര കമ്മിറ്റി പ്രസിഡൻ്റ് അജേന്ദ്ര അജയ്യുടെ സാന്നിധ്യത്തിൽ ഉത്തരാഖണ്ഡിലെ ഉഖിമഠിലെ പച്ചാദർ ഗഡ്ഡി സ്ഥൽ ശ്രീ ഓംകാരേശ്വർ ക്ഷേത്രത്തിൽ നടന്ന ചടങ്ങിലാണ് തീരുമാനം. എല്ലാ വർഷവും മഹാശിവരാത്രി നാളിൽ ഉഖിമഠിലാണ് കേദാർനാഥ് ക്ഷേത്രം തുറക്കുന്ന തീയതി പ്രഖ്യാപിക്കുന്നത്.
ലക്ഷക്കണക്കിന് ആളുകൾ സന്ദർശിക്കുന്ന ഈ മഹാ ക്ഷേത്രം മഞ്ഞുകാലത്ത് മഞ്ഞുവീഴ്ച കാരണം അടച്ചിരിക്കും. ഇക്കുറി ശൈത്യകാലത്തിനു മുന്നോടിയായി 2023 നവംബർ 15 നാണ് ക്ഷേത്രം അടച്ചത് . പിന്നീട് ഏപ്രിൽ – മെയ് മാസങ്ങളിൽ ക്ഷേത്രം വീണ്ടും തുറക്കും. ശൈത്യകാലത്ത് ക്ഷേത്രം അടച്ചിട്ടിരിക്കുമ്പോൾ, വിഗ്രഹം ഉഖിമഠിലേക്ക് മാറ്റുകയും ഏപ്രിൽ – മെയ് മാസങ്ങളിൽ വീണ്ടും കേദാർനാഥ് ധാമിൽ സ്ഥാപിക്കുകയും ചെയ്യുന്നു.
കേദാർനാഥ് ക്ഷേത്രം ഇന്ത്യയിലെ പതിനൊന്നാമത്തെ ജ്യോതിർലിംഗമാണ് . എല്ലാ വർഷവും ആയിരക്കണക്കിന് ഭക്തർ ഈ വിശുദ്ധ പുണ്യസ്ഥലത്തേക്ക് തീർത്ഥാടനം നടത്തുന്നു. ഉത്തരാഖണ്ഡിലെ പ്രശസ്തമായ ചാർ ധാം യാത്രയുടെ ഭാഗമാണ് ഈ തീർത്ഥാടനം .
