വെയിൽ കൊണ്ട് വാടിതളരുമ്പോൾ പലരും കുടിക്കുന്ന പാനീയമാണ് സർബത്ത്. നന്നാറി അല്ലെങ്കിൽ നറുനീണ്ടി ചേർത്ത സർബത്തുകൾക്ക് പ്രത്യേക രുചിയാണ്. ചൂട് കാലമായാൽ നന്നാറി സർബത്തുകൾ കുടിക്കാത്തവർ കുറവായിരിക്കും. നിലത്തോട് പറ്റിപിടിച്ച് വളരുന്ന പുല്ലുവർഗത്തിൽപ്പെട്ട ഒരു തരം സസ്യമാണ് നന്നാറി. ഇവയുടെ കിഴങ്ങുകളാണ് മുഖ്യമായും ഉപയോഗിക്കുന്നത്. വേനൽ കടുത്ത് വരുന്ന സമയത്ത് ഇനി നന്നാറി സർബത്ത് കുടിക്കാൻ പുറത്തേക്ക് ഇറങ്ങേണ്ട. വീടുകളിൽ തന്നെ ഇതിന്റെ സിറപ്പ് എളുപ്പത്തിൽ തയ്യാറാക്കിയെടുക്കാം..
ചേരുവകൾ
നന്നാറി- 4, 5 എണ്ണം
ഏലക്കായ- 4 എണ്ണം
പഞ്ചസാര- ആവശ്യത്തിന്
ഗ്രാമ്പു- 4 എണ്ണം
തയ്യാറാക്കുന്ന വിധം
നന്നാറി വെള്ളത്തിലിട്ട് കുതിർത്ത ശേഷം നന്നായി ചതച്ചെടുക്കുക. ഒരു പാത്രത്തിൽ പഞ്ചസാരയിട്ട് നന്നായി ഇളക്കുക. പഞ്ചസാര ബ്രൗൺ നിറത്തിലാവുന്നത് വരെ ഇങ്ങനെ ചെയ്യണം. ശേഷം ഇതിലേക്ക് ആവശ്യത്തിന് വെള്ളം ഒഴിച്ച് നന്നായി തിളപ്പിക്കുക. വെള്ളം തിളച്ച് വരുമ്പോൾ ഗ്രാമ്പു, ചതച്ച നന്നാറി, ഏലക്ക എന്നിവ ചേർത്ത് ഇളക്കി കൊടുക്കുക. ചൂട് മാറിയ ശേഷം അരിച്ചെടുത്ത് കുപ്പിയിലാക്കാം. ആവശ്യമുള്ള സമയത്ത് ഒരു ഗ്ലാസിൽ അൽപം സിറപ്പും നാരങ്ങാ നീരും ഒഴിച്ച് സർബത്തുണ്ടാക്കി കുടിക്കാം.
