മാലി: വായ്പ തിരിച്ചടയ്ക്കാൻ സമയ പരിധി ആവശ്യമാണെന്ന അഭ്യർത്ഥനയുമായി മാലദ്വീപ് പ്രസിഡന്റ് മുഹമ്മദ് മൊയ്‌സു. ഇന്ത്യയുമായുള്ള സൗഹൃദം തുടരാൻ ആഗ്രഹമുണ്ടെന്നും ഭാരതം മാലദ്വീപിന്റെ ഏറ്റവും അടുത്ത സഖ്യകക്ഷികളായിരിക്കുമെന്നും അദ്ദേഹം പറഞ്ഞു. ഏകദേശം 400.9 യുഎസ് ഡോളറാണ് ഇന്ത്യയ്‌ക്ക് മാലദ്വീപ് നൽകാനുള്ളത്.
ഏപ്രിലിൽ മാലദ്വീപിൽ നടക്കാനിരിക്കുന്ന തെരഞ്ഞെടുപ്പിന് മുന്നോടിയായാണ് മുഹമ്മദ് മൊയ്‌സു ഇപ്പോൾ സഹായം അഭ്യർത്ഥിച്ച് രംഗത്തെത്തിയിരിക്കുന്നത്. ഇന്ത്യ നിരവധി സഹായങ്ങൾ മാലദ്വീപിനായി നൽകിയിട്ടുണ്ടെന്നും ഇന്ത്യയുടെ സഖ്യകക്ഷികളായി തുടരാൻ ഇപ്പോഴും ആഗ്രഹമുണ്ടെന്നും മൊയ്‌സു വ്യക്തമാക്കി. കടമെടുത്ത തുക അടച്ചു തീർക്കാനുള്ള സാവകാശം ചോദിച്ചുകൊണ്ടായിരുന്നു അദ്ദേഹത്തിന്റെ വാക്കുകൾ.
കഴിഞ്ഞ കുറച്ചു വർഷങ്ങളായി ഇന്ത്യയുടെ ഭാഗത്ത് നിന്ന് മാനുഷിക സഹായങ്ങൾ മാലദ്വീപിന് നൽകുന്നുണ്ട്. ഇത്തരം സേവനങ്ങൾ വരും വർഷങ്ങളിലും തുടരണമെന്നും മൊയ്‌സു പറഞ്ഞു. വായ്പ അടച്ചു തീർക്കാൻ കാലവാധി നീട്ടണമെന്നും ഇളവുകൾ അനുവദിക്കണമെന്നും മുഹമ്മദ് മൊയ്‌സു കൂട്ടിച്ചേർത്തു. മാലദ്വീപ് സമ്പദ്വ്യവസ്ഥയ്‌ക്ക് താങ്ങാവുന്നതിലും ഭാരിച്ച വായ്പകളാണ് ഇന്ത്യയിൽ നിന്ന് മാലദ്വീപ് എടുത്തിട്ടുള്ളതെന്നും അദ്ദേഹം വ്യക്തമാക്കി.
എന്നാൽ പ്രധാനമന്ത്രി നരേന്ദ്രമോദിയെയും ഇന്ത്യയെയും അധിക്ഷേപിച്ച മാലദ്വീപ് മന്ത്രിമാർക്കെതിരെ അനുകൂല സമീപനമാണ് പ്രസിഡന്റ് മുഹമ്മദ് മൊയ്‌സു കൈക്കൊണ്ടത്. അധികാരത്തിലേറിയ നാൾ മുതൽ ചൈനയ്‌ക്ക് അനുകൂലമായ നിലപടുകളായിരുന്നു മൊയ്‌സു എടുത്തിരുന്നത്.
