ന്യൂഡൽഹി: റെക്കോർഡ് നേട്ടത്തിൽ ഭാരതത്തിന്റെ വിദേശനാണ്യ കരുതൽ ശേഖരം (ഫോറക്സ് റിസർവ്). മാർച്ച് 15 ന് അവസാനിച്ച ആഴ്ചയിൽ വിദേശനാണ്യ ശേഖരം 64229 കോടി ഡോളറായി (642.292 ബില്യൺ ഡോളർ) ഉയർന്നതായി റിസർവ് ബാങ്കിന്റെ പുതിയ കണക്കുകൾ വ്യക്തമാക്കുന്നു. ഇതേ കാലയളവിൽ 639.6 കോടി ഡോളറിന്റെ വർദ്ധനവാണ് രേഖപ്പെടുത്തിയിരിക്കുന്നത്. തുടർച്ചയായി നാലാമത്തെ ആഴ്ചയാണ് ശേഖരം ഉയർച്ചയിലെത്തുന്നത്. ഇതോടെ ഇന്ത്യയുടെ വിദേശനാണ്യ കരുതൽ ശേഖരം എക്കാലത്തെയും ഉയർന്ന നിലയിലെത്തി.
കഴിഞ്ഞ നാലാഴ്ച കൊണ്ട് ഇന്ത്യയുടെ വിദേശ നാണയ ശേഖരം 603.4 കോടി ഡോളർ ഉയർന്ന് 56838.6 കോടി ഡോളറിലെത്തിയതായി സെൻട്രൽ ബാങ്കിന്റെ പ്രതിവാര കണക്കുകൾ വ്യക്തമാക്കുന്നു. വിദേശനാണ്യ ശേഖരത്തിനൊപ്പം സ്വർണ്ണ ശേഖരത്തിലും റെക്കോർഡ് സ്വന്തമാക്കിയ ആഴ്ചകളാണ് കടന്ന് പോയത്. ഈ ആഴ്ചയിലെ സ്വർണശേഖരം 42.5 കോടി ഡോളർ ഉയർന്ന് 5114 കോടി ഡോളറിലെത്തി.
റിസർവ് ബാങ്ക് ഓഫ് ഇന്ത്യയുടെ റിപ്പോർട്ട് പ്രകാരം 2023 കലണ്ടർ വർഷത്തിൽ വിദേശനാണ്യ ശേഖരത്തിൽ ആകെ 5800 കോടി ഡോളറിന്റെ വർദ്ധനവാണ് കാണിക്കുന്നത്.
കേന്ദ്ര ബാങ്ക് സൂക്ഷിക്കുന്ന വിദേശ കറൻസി ആസ്തിയാണ് വിദേശനാണ്യ കരുതൽ ശേഖരം. ബാങ്ക് നോട്ടുകൾ, നിക്ഷേപം, ബോണ്ടുകൾ, ട്രഷറി ബില്ലുകൾ, മറ്റു ഗവൺമെന്റ് സെക്യൂരിറ്റികൾ തുടങ്ങിയവയെല്ലാം ഇതിന്റെ ഭാഗമാണ്. അടിസ്ഥാനപരമായി ഇവ രാജ്യത്തിന്റെ സ്വത്തുക്കളാണ്. ഭാരതത്തിൽ ആർബിഐയാണ് ഇത് കൈകാര്യം ചെയ്യുന്നത്.
യുഎസ് ഡോളർ മുതൽ യൂറോ, ജപ്പാനീസ് യെൻ, പൗണ്ട് എന്നീ റിസർവ് കറൻസികളാണ് വിദേശനാണ്യ ശേഖരത്തിൽ പ്രധാനമായും ഉൾപ്പെടുന്നത്. രൂപയുടെ മൂല്യം ഇടിഞ്ഞാൽ വിദേശനാണ്യം ഉപയോഗിച്ചാണ് ഡോളർ-രൂപ വിനിമയനിരക്ക് കുറയ്‌ക്കുന്നത്. 2021 ഒക്ടോബറിലാണ് ഇന്ത്യയുടെ വിദേശനാണ്യ ശേഖരം ഈയിടെ ഏറ്റവും ഉയർന്ന നിലയിൽ എത്തിയത്.
