തെന്നിന്ത്യൻ സിനിമാലോകം ഏറെ ആവേശത്തോടെ കാത്തിരിക്കുന്ന ചിത്രമാണ് മണിരത്നം- കമൽഹാസൻ കൂട്ടുകെട്ടിന്റെ തഗ് ലൈഫ്. വൻതാരനിര തന്നെ അണിനിരക്കുന്ന ചിത്രത്തിൽ നിന്ന് ദുൽഖറിന് പിന്നാലെ ഒരു നടൻ കൂടി പിന്മാറിയിരിക്കുകയാണ്. ചിത്രത്തിൽ നിന്ന് നടൻ ജയം രവിയാണ് ഒടുവിൽ പിൻമാറിയത്.
ഡേറ്റ് ക്ലാഷ് കാരണമാണ് ജയം രവിയും ചിത്രത്തിൽ നിന്ന് പിന്മാറിയത്. ഇതോടെ ചിത്രത്തിലേക്ക് നിവിൻ പോളിയെയും അരവിന്ദ് സ്വാമിയെയും പരിഗണിച്ചുവെന്നതാണ് പുതിയ വാർത്ത. എന്നാൽ ഇക്കാര്യത്തിൽ ഇതുവരെ ഔദ്യോഗിക സ്ഥിരീകരണം ഉണ്ടായിട്ടില്ല. സംവിധായകൻ മണിരത്നവുമായുള്ള ദീർഘകാല ബന്ധം കണക്കിലെടുത്ത് അരവിന്ദ് സ്വാമിയെ പരിഗണിക്കുന്ന കാര്യത്തിൽ ഉറപ്പുണ്ടെന്നും റിപ്പോർട്ടുണ്ട്.
ചിത്രത്തിൽ നിന്ന് ദുൽഖർ പിന്മാറിയതോടെ ചിമ്പുവിനാണ് ആ വേഷം ലഭിച്ചിരിക്കുന്നത്. മറ്റു സിനിമകളുടെ തിരക്കുകൾ കാരണമാണ് ദുൽഖറും ചിത്രത്തിൽ നിന്ന് പിന്മാറിയത്.
തൃഷ, ഗൗതം കാർത്തിക്, ഐശ്വര്യ ലക്ഷ്മി, ജോജു ജോർജ് എന്നിവരാണ് ചിത്രത്തിലെ മറ്റ് കഥാപാത്രങ്ങൾ. രാജ്കമൽ ഫിലിംസ് ഇന്റർനാഷണൽ, മദ്രാസ് ടാക്കീസ്, റെഡ് ജയന്റ് മൂവീസ്, ആർ.മഹേന്ദ്രൻ, ശിവ അനന്ത് എന്നിവർ ചേർന്നാണ് ചിത്രത്തിന്റെ നിർമ്മാണം.