മുംബൈ: മഹാരാഷ്ട്ര മുഖ്യമന്ത്രി ഏക്നാഥ് ഷിൻഡെ വിഭാഗം ശിവസേനയിൽ അംഗത്വം നേടി ബോളിവുഡ് താരം ഗോവിന്ദ. വീണ്ടും രാഷ്ട്രീയത്തിൽ എത്തുമെന്ന് കരുതിയിരുന്നില്ലെന്നും ഇത് ദൈവത്തിന്റെ അനുഗ്രഹമാണെന്നും അംഗത്വം സ്വീകരിച്ചതിന് പിന്നാലെ ഗോവിന്ദ പ്രതികരിച്ചു. മുംബൈയിലെ ബാലാസാഹേബ് ഭവനിൽ നടന്ന ചടങ്ങിൽ മുഖ്യമന്ത്രി ഷിൻഡെയിൽ നിന്നാണ് താരം പാർട്ടി അംഗത്വം സ്വന്തമാക്കിയത്. ഒരിടവേളയ്ക്ക് ശേഷം രാഷ്ട്രീയത്തിലേക്ക് തിരിച്ചെത്തുന്ന ഗോവിന്ദ മുബൈ നോർത്ത് വെസ്റ്റിൽ നിന്ന് മത്സരിച്ചേക്കുമെന്നാണ് സൂചന.
ശിവസേനയിൽ അംഗത്വം ലഭിച്ചത് ദൈവത്തിന്റെ അനുഗ്രഹമായി കാണുന്നു. 14 വർഷത്തിന് ശേഷമാണ് വീണ്ടും രാഷ്ട്രീയത്തിൽ എത്തുന്നത്. ഇനി രാഷ്ട്രീയത്തിലേക്ക് ഒരു മടങ്ങിവരവ് വേണ്ടെന്ന് കരുതിയിരുന്നു. എന്നാൽ ഏക്നാഥ് ഷിൻഡെയുടെ നേതൃത്വത്തിൽ മുംബൈ നഗരം കൂടുതൽ പുരോഗതി നേടിയതായി കാണാൻ കഴിഞ്ഞു രാഷ്ട്രീയത്തിലേക്കുള്ള മടങ്ങിവരവിന് ഇതൊരു കാരണമായെന്നും ഗോവിന്ദ പറഞ്ഞു.’
2004ലെ ലോക്സഭാ തിരഞ്ഞെടുപ്പിൽ കോൺഗ്രസ് സ്ഥാനാർത്ഥിയായി ഗോവിന്ദ മത്സരിച്ചിരുന്നു. മുംബൈ നോർത്തിൽ നിന്ന് തന്നെയായിരുന്നു അദ്ദേഹം ലോക്സഭയിലേക്ക് മത്സരിച്ചത്. എന്നാൽ, 2009ൽ കോൺഗ്രസ് പാർട്ടിയിൽ നിന്നും രാജിവയ്ക്കുകയായിരുന്നു ഗോവിന്ദ.