തിരുവനന്തപുരം: കേരളത്തിൽ അത്ഭുതങ്ങൾ സംഭവിക്കുമെന്നും ബിജെപി സീറ്റുനേടുമെന്നും മഹാരാഷ്‌ട്ര ഉപമുഖ്യമന്ത്രി ദേവേന്ദ്ര ഫഡ്നാവിസ്. പ്രധാനമന്ത്രി നരേന്ദ്ര മോദിക്ക് കീഴിൽ രാജ്യം മുന്നോട്ട് കുതിക്കുകയാണ്. അദ്ദേഹത്തിന്റെ നേതൃത്വത്തിലാണ് ഭാരതം ലോകത്തിലെ അഞ്ചാമത്തെ വലിയ സാമ്പത്തിക ശക്തിയായി മാറിയത്. അടുത്ത 5 വർഷം കൊണ്ട് രാജ്യം മൂന്നാമത്തെ വലിയ സാമ്പത്തിക ശക്തിയാകും. ഭരണ വിരുദ്ധ വികാരമല്ല, ഭരണാനുകൂല വികാരമാണ് രാജ്യത്ത് അലയടിക്കുന്നത്. കേരളത്തിലെ ജനങ്ങളും ദേശീയതയുടെ മുഖ്യധാരയിലേക്ക് വന്നുകഴിഞ്ഞു. ഇത്തവണ കേരളത്തിൽ ബിജെപിക്ക് വോട്ട് കൂടുമെന്നും സീറ്റ് ലഭിക്കുമെന്നും അദ്ദേഹം പറഞ്ഞു. വലിയ സാധ്യതകളുള്ള നഗരമാണ് തിരുവനന്തപുരം. തലസ്ഥാനത്തിന് അനുയോജ്യനായ സ്ഥാനാർത്ഥിയാണ് രാജീവ് ചന്ദ്രശേഖറെന്നും അദ്ദേഹം കൂട്ടിച്ചേർത്തു.
പ്രധാനമന്ത്രി നരേന്ദ്രമോദിയുടെ കീഴിൽ രാജ്യത്തിന്റെ വികസനം അതിവേഗം മുന്നോട്ടുപോവുകയാണ്. ഗരിബ് കല്യാൺ യോജന ഉൾപ്പെടെയുള്ള പദ്ധതികളുടെ ഫലമാണിത്. 25 കോടി പേർ ദാരിദ്ര്യ രേഖയ്‌ക്ക് മുകളിലായി. ഇത് ലോകത്ത് ഒരു രാജ്യത്തും ഉണ്ടായിട്ടില്ല. 20 കോടി ജനങ്ങൾക്ക് വീട്, 50 കോടി പേർക്ക് കുടിവെള്ളം തുടങ്ങിയവ നൽകി. പദ്ധതികൾ ഇപ്പോഴും തുടരുന്നു. കഴിഞ്ഞ 10 വർഷത്തെ ഭരണത്തിൽ ജനങ്ങൾ സംതൃപ്തരാണ്.
ദേശീയതലത്തിൽ കോൺഗ്രസിനും ഇടത് പാർട്ടികൾക്കും ഒരേ അജണ്ടയാണ്. അവർ തമ്മിൽ യാതൊരുവിധ വ്യത്യാസവുമില്ല. അഴിമതിയും അടിച്ചമർത്തലുമാണ് അവരുടെ അജണ്ട. ഇത് കേരളത്തിലെ ജനങ്ങൾക്ക് അറിയാം. വിദ്യാസമ്പന്നരാണ് കേരളീയർ. എൽഡിഎഫും യുഡിഎഫും വോട്ട് ബാങ്കിനായി ദേശവിരുദ്ധ ശക്തികളെ പ്രീണിപ്പിക്കുന്നു. അവരുമായി സഖ്യമുണ്ടാക്കുന്നു. കേരളം വികസനത്തിൽ വളരെ പിന്നിലേക്ക് പോവുകയാണ്. ഇതെല്ലാം കേരളീയർക്ക് അറിയാം. അതിനാൽ തന്നെ കേരളത്തിലെ ജനങ്ങളും ദേശീയതയുടെ മുഖ്യധാരയിലേക്ക് വരുമെന്നും മോദിക്കൊപ്പം അണിനിരക്കുമെന്നും ഫഡ്നാവിസ് പറഞ്ഞു.
വലിയ സാധ്യതകളുള്ള നഗരമാണ് തിരുവനന്തപുരം. തലസ്ഥാനത്തിന് അനുയോജ്യനായ സ്ഥാനാർത്ഥിയാണ് രാജീവ് ചന്ദ്രശേഖർ. 90-കളിൽ രാജ്യത്ത് ആദ്യമായി ടെക്നോപാർക്കുകൾ ആരംഭിച്ച നഗരമാണ് തിരുവനന്തപുരം. അതിനുശേഷം തുടങ്ങിയ പല നഗരങ്ങളും ഇന്ന് ടെക്നോളജി ഹബ്ബുകളായി മാറി. എന്നാൽ തിരുവനന്തപുരം ഇന്നും വളരെപുറകിലാണ്. മന്ത്രി എന്ന നിലയിൽ മികച്ച പദ്ധതികൾ കൊണ്ടുവന്നിട്ടുള്ള ആളാണ് രാജീവ് ചന്ദ്രശേഖർ. തിരുവനന്തപുരത്തിന്റെ കാര്യത്തിൽ വലിയ പ്രതീക്ഷയാണുള്ളത്. സാധ്യതകളെ പ്രായോഗിക വത്ക്കരിക്കാൻ രാജീവ് ചന്ദ്രശേഖറിന് കഴിയുമെന്നും അദ്ദേഹം പറഞ്ഞു.
