കൊച്ചി: തൃശൂർ പൂരത്തിന് തെച്ചിക്കോട്ട് കാവ് രാമചന്ദ്രനെ എഴുന്നളളിക്കുന്ന കാര്യത്തിൽ തീരുമാനം 17 ന്. ഹൈക്കോടതിയാണ് ഇക്കാര്യത്തിൽ തീരുമാനമെടുക്കുക. പൂരത്തിന് എഴുന്നളളിക്കുന്ന മുഴുവൻ ആനകളുടെയും പട്ടികയും ഫിറ്റ്‌നസ് സർട്ടിഫിക്കറ്റും സമർപ്പിക്കാനും കോടതി നിർദ്ദേശിച്ചു.
വനം വകുപ്പിനാണ് നിർദ്ദേശം നൽകിയിരിക്കുന്നത്. പതിനാറാം തീയതി റിപ്പോർട്ട് സമർപ്പിക്കണം. ചീഫ് വൈൽഡ് ലൈഫ് വാർഡൻ പുറപ്പെടുവിച്ച ഉത്തരവ് കർശനമായി നടപ്പാക്കണമെന്നും കോടതി നിയോഗിച്ച അമിക്കസ് ക്യൂറി ആനകളെ പരിശോധിക്കണമെന്നും ഹൈക്കോടതി നിർദ്ദേശിച്ചു.
ആരോഗ്യ പ്രശ്‌നങ്ങളും മദപ്പാടുമുള്ള ആനകളെ പൂരത്തിൽ പങ്കെടുക്കാൻ അനുവദിക്കില്ലെന്നും കോടതി വ്യക്തമാക്കി. പൂരത്തിന് ഇന്ന് കൊടിയേറാനിരിക്കെയാണ് കോടതിയുടെ നിർദ്ദേശം പുറത്തുവരുന്നത്. 19 നാണ് പൂരം നടക്കുക. ഘടക ക്ഷേത്രങ്ങളിലൊന്നായ ലാലൂർ ക്ഷേത്രത്തിൽ രാവിലെ കൊടിയേറ്റ് നടന്നു. പാറമേക്കാവ്, തിരുവമ്പാടി ദേവസ്വങ്ങളിലും ഇന്ന് കൊടിയേറും.
തെച്ചിക്കോട്ട് കാവ് രാമചന്ദ്രൻ പൂര എഴുന്നളളത്തിനുണ്ടാകുമെന്ന പ്രതീക്ഷയിലാണ് പൂരപ്രേമികൾ.
