കൊൽക്കത്ത: പശ്ചിമ ബംഗാളിൽ രാമനവമി ആഘോഷത്തിനിടെ സ്ഫോടനം. പൊട്ടിത്തെറിയിൽ ഒരാൾക്ക് പരിക്കേറ്റു. ബംഗാളിലെ മുർഷിദാബാദ് ജില്ലയിലാണ് സംഭവമുണ്ടായത്. ശക്തിപൂർ മേഖലയിൽ രാമനവമിയോടനുബന്ധിച്ച് ഘോഷയാത്ര നടന്നിരുന്നു. ഇതിനിടെയാണ് സ്ഫോടനമുണ്ടായത്.
സംഭവത്തിൽ ഒരു സ്ത്രീക്കാണ് പരിക്കേറ്റിരിക്കുന്നതെന്നും ഇവരെ മുർഷിദാബാദ് മെഡിക്കൽ കോളേജിൽ പ്രവേശിപ്പിച്ചതായും പിടിഐ റിപ്പോർട്ട് ചെയ്തു. സംഭവത്തിൽ പോലീസ് അന്വേഷണം ആരംഭിച്ചതായാണ് വിവരം. സ്ഫോടനത്തിന് കാരണമെന്താണെന്ന് ഇതുവരെയും വ്യക്തമാക്കിയിട്ടില്ല.
ശക്തിപൂരിലെ ഘോഷയാത്ര അലങ്കോലപ്പെടുത്താൻ ഒരു കൂട്ടമാളുകൾ ശ്രമിച്ചതായും ചില ദേശീയ മാദ്ധ്യമങ്ങൾ റിപ്പോർട്ട് ചെയ്യുന്നുണ്ട്. റാലിക്ക് നേരെ കല്ലേറ് നടന്നതായും ആളുകൾക്ക് പരിക്കേറ്റതായും ഇന്ത്യാ ടുഡേ റിപ്പോർട്ട് ചെയ്തു.
