കരുത്തിന്റെ ദേവൻ ഭഗവാൻ ഹനുമാന്റെ ജന്മദിനമാണ് ഹനുമദ് ജയന്തിയായി ആചരിക്കുന്നത്. പരമശിവന്റെ അവതാരമാണ് ഹനുമാൻ എന്നാണ് വിശ്വാസം. ചൈത്ര പൗർണമി ദിനത്തിലാണ് ഹനുമദ് ജയന്തി ആഘോഷിക്കുന്നത്. സാധാരണയായി ഏപ്രിൽ മാസത്തിലാണ് ഹനുമദ് ജയന്തി ആഘോഷിക്കുന്നത്. ഇത്തവണത്തെ ഹനുമദ് ജയന്തി ഏപ്രിൽ 23 ചൊവ്വാഴ്ചയാണ്.
ഹനുമദ് ജയന്തി ദിനത്തിൽ ഭക്തർ ഹനുമദ് പ്രീതിക്കായി വ്രതം നോറ്റ് രാമനാമ ജപവുമായി കഴിയാറാണ് പതിവ്. മാർഗ്ഗ തടസങ്ങൾ മാറുന്നതിനും ശത്രുദോഷ ശാന്തിക്കും ഹനുമദ് ഭജനം സഹായിക്കുമെന്നാണ് വിശ്വാസം. ഈ ദിനത്തിൽ ഹനുമദ് പ്രതിഷ്ഠയുള്ള ക്ഷേത്രങ്ങളിൽ ദർശനം നടത്തുന്നത് ഉദ്ദിഷ്ടകാര്യ സാധ്യത്തിന് സഹായിക്കും എന്നും വിശ്വസിച്ച് പോരുന്നു. പൂയം, അനിഴം, ഉത്രട്ടാതി നക്ഷത്രക്കാർ പതിവായി ഹനുമാനെ ഭജിക്കുന്നത് നല്ല ഫലങ്ങൾ നൽകും.
ഹനുമാൻ ചാലിസ അർത്ഥ സഹിതം വായിക്കുവാൻ ഇവിടെ ക്ലിക്ക് ചെയ്യുക
https://janamtv.com/tag/hanuman-chalisa-malayalam/
ഹനുമദ് പ്രീതിക്കായി ശ്രീരാമഭജനവും ഉത്തമമാണ്. ആഞ്ജനേയന് വെറ്റിലമാല സമർപ്പിച്ച് പ്രാർത്ഥിച്ചാൽ ദോഷത്തിന്റെ കാഠിന്യം കുറഞ്ഞ് ഉന്നത വിജയം നേടാൻ കഴിയും എന്നാണ് വിശ്വാസം. ഹനുമാൻ സ്വാമിക്ക് പൂജിക്കാനായി വെറ്റിലമാലകൾ ഉപയോഗിക്കുന്നതിന് ഒരു കാരണമുണ്ട്. രാമന്റെ വിജയം ആദ്യം സീതയെ അറിയിച്ചത് ഹനുമാനാണ്. ആ വാർത്ത കേട്ട് അതീവ സന്തുഷ്ടയായ സീത അടുത്തുണ്ടായിരുന്ന വെറ്റിലകൾ പറിച്ച് ഹാരമാക്കി ഹനുമാനെ അണിയിക്കുകയായിരുന്നു.
ഹനുമാനെ പ്രാർത്ഥിക്കുമ്പോൾ പാദങ്ങളിൽ തുളസി ഇലകൾ സമർപ്പിക്കാൻ പാടില്ല. ഇത് വളരെ അധർമമായ പ്രവൃത്തിയായാണ് കാണുന്നത്. കാരണം ലക്ഷ്മീ വാസമുളള ദൈവീകമായ സസ്യമാണ് തുളസി. ഹനുമാൻ സ്വാമി ലക്ഷ്മീദേവിയെ സീതാദേവിക്ക് സമമായി കരുതുന്ന വ്യക്തിയാണ്. അതിനാൽ തന്നെയാണ് തുളസിയെ ഹനുമദ് പൂജകൾക്ക് ഉപയോഗിക്കാൻ പാടില്ല എന്ന് പറയുന്നതിന് പിന്നിലെ വാസ്തവം. തുളസി മാലയാക്കി ഹനുമാന് സമർപ്പിക്കുന്നതിൽ തെറ്റില്ല.
ഹനുമാൻ ചാലിസ ഭാഗം 1;ആമുഖം; ഒന്ന് മുതൽ ഏഴു വരെ ശ്ലോകങ്ങൾ……
രാമായണത്തിലെ സുന്ദരകാണ്ഡം പാരായണം ചെയ്യുന്നത് ഹനുമദ് പ്രീതിക്ക് ഉത്തമമാണ്. രാമായണത്തിലെ മറ്റ് ഭാഗങ്ങളെക്കാൾ തന്റെഭാഗങ്ങളെ പ്രകീർത്തിക്കുന്ന ഈ ഭാഗം ഭക്തർ അനുസ്മരിക്കുന്നത് ഭഗവാന് ഏറെ പ്രീതികരമാകുന്നു. ചൊവ്വ, ശനി ദോഷകാലം അനുഭവിക്കുന്നവർക്ക് ഹനുമദ് ഭജനം ഉത്തമ പ്രതിവിധിയാണ്. ദുരിതങ്ങളുടെ കാഠിന്യം കുറയ്‌ക്കാൻ ചൊവ്വ, ശനി ദിവസങ്ങളിലും ജന്മനക്ഷത്ര ദിനത്തിലും ഹനുമാൻ ക്ഷേത്രങ്ങളിൽ ദർശനം നടത്തുന്നതും നല്ലതാണ്.
ഹനുമാനെ ഭജിക്കുന്നവരെ ശനി ദോഷങ്ങൾ ബാധിക്കാറില്ല. അഷ്ടമശനി, ഏഴര ശനി, കണ്ടക ശനി ഇവയുടെ ദോഷശാന്തിയ്‌ക്ക് ഹനുമദ് ഭജനം ഉത്തമമാണ്. ജന്മനക്ഷത്ര ദിവസവും ശനിയാഴ്ചയും ഹനുമാൻ ക്ഷേത്ര ദർശനം നടത്തുത്തന് ശ്രേയസ്‌കരമാണ്. ബ്രഹ്‌മചര്യത്തോടെയും ശുചിത്വത്തോടെയും കൂടി വേണം ഇവ ചെയ്യുവാൻ. മേൽപറഞ്ഞ നിഷ്ഠയോടെ ജന്മനക്ഷത്ര ദിവസവും ചൊവ്വാഴ്ചയും ഹനുമദ് ക്ഷേത്രം ദർശിക്കുന്നത് ചൊവ്വാദോഷ പരിഹാരത്തിനും അത്യുത്തമമാണ്.
ഹനുമാൻ ചാലിസ ഭാഗം രണ്ട് ; 8 മുതൽ 25 വരെ ശ്ലോകങ്ങൾ……
ഹനുമദ് ജയന്തി ദിനത്തിൽ രാവിലെ ക്ഷേത്ര ദർശനം കഴിഞ്ഞ് പ്രഭാത ജപം തുടങ്ങുക. ശുദ്ധിയും വൃത്തിയും ഉള്ള സ്ഥലത്ത് ഇരുന്ന് ശ്രീരാമജയം എന്ന മന്ത്രം 108 പ്രാവശ്യം ജപിക്കണം. തുടർന്ന്
മനോജവം മാരുത തുല്യവേഗം
ജിതേന്ദ്രിയം ബുദ്ധിമതാം വരിഷ്ഠം
വാതാത്മജം വാനരയൂഥ മുഖ്യം
ശ്രീരാമ ദൂതം ശിരസാ നമാമി
ബുദ്ധിർ ബലം യശോധൈര്യം
നിർഭയത്വം അരോഗത
അജാഢ്യം വാക് പടുത്വം
ഹനുമത് സ്മരണാത് ഭവേത്
എന്ന മന്ത്രം ജപിക്കുക.
ഹനുമാൻ ചാലിസ ഭാഗം മൂന്ന് ; 26 മുതൽ 38 വരെ ശ്ലോകങ്ങൾ……
ഉച്ചയ്‌ക്ക്,
ഓം വായുപുത്രായ ദേവായ
നിത്യബ്രഹ്‌മ പരായണ സനാതനായ
പൂജ്യായ ആജ്ഞനേയാത്മനേ നമഃ
എന്ന മന്ത്രം 64 പ്രാവശ്യം ജപിക്കുക.
ഓം ഉഗ്രരൂപായ ധീരായ
രക്തതർപ്പണ മാനസ
ഹം ഹനുമതേ ദേവാ
വീരശൂര മഹാത്മനേ
ബീജരൂപായ നിത്യായ
ശത്രുസംഹാര ഹും നമഃ
എന്ന മന്ത്രം 84 പ്രാവശ്യം ജപിക്കണം.
സന്ധ്യാ വേളയിൽ ,
ഓം ഹം ഹനുമതേ ഉഗ്രായ
ശൂരായ മഹാശക്തിരൂപിണേ സർവ്വാത്മകായ
മഹതേ നിത്യയോഗായ
രാമഭക്തായ രാക്ഷസവംശ
വിഘാതനായ ഹം ഹനുമതേ നമഃ
എന്ന മന്ത്രം 82 പ്രാവശ്യം ജപിക്കുക.
ഓം നമോ ഭഗവതേ ഉഗ്രരുദ്രായ
ശാന്തിദായിനേ ബലരൂപിണേ നമഃ
എന്ന മന്ത്രം 48 പ്രാവശ്യം ജപിക്കുക.
ഹനുമാൻ ചാലിസ ഭാഗം 4 (അവസാന ഭാഗം)……
സന്ധ്യാവേളയിലും ക്ഷേത്രദർശനം നടത്തണം. മന്ത്രങ്ങൾ, സ്തോത്രങ്ങൾ, കീർത്തനങ്ങൾ, ഭജനകൾ എന്നിവ പരമാവധി ഈ ദിനത്തിൽ ജപിക്കണം. ഏപ്രിൽ 5, 7 തീയതികളിൽ മൂലമന്ത്രം മാത്രം ജപിച്ചാൽ മതി. 7-ന് രാവിലെ ക്ഷേത്രദർശനം നടത്തി വ്രതം പൂർത്തിയാക്കാം. ക്ഷേത്രത്തിൽ നിന്നും ലഭിക്കുന്ന തീർത്ഥം സേവിച്ചാണ് വ്രതം പൂർത്തിയാക്കേണ്ടത്.
ഹനുമദ് ജയന്തി ദിനത്തിൽ ഹനുമാൻ ചാലിസ പാരായണം ചെയ്യുന്നതും കേൾക്കുന്നതും സവിശേഷമാണ്. നമ്മളിൽ ഭയപ്പെടുത്തുന്ന ചിന്തകൾ അകറ്റുവാനും ദുഃസ്വപ്നം കാണാതിരിക്കാനും ചാലിസ ജപം വളരെ നല്ലതാണ്. ഹനുമാൻ ചാലിസയുടെ പ്രാരംഭ ശ്ലോകങ്ങൾ ജപിക്കുന്നതിലൂടെ ഈ ജന്മത്തിലും കഴിഞ്ഞ ജന്മത്തിലും ചെയ്ത പാപങ്ങളിൽനിന്നു മോചനം ലഭിക്കുമെന്നാണ് വിശ്വാസം. ഉത്തമഭക്തിയോടെ ജപിക്കുന്ന ഭക്തനെ യാതൊരുവിധ ക്ലേശങ്ങളിലും ദുരിതങ്ങളിലും അകപ്പെടാതെ ഹനുമാൻ സ്വാമി രക്ഷിക്കും എന്നാണ് പറയപ്പെടുന്നത്. ആഗ്രഹപൂർത്തീകരണത്തിനും ഏറ്റവും ഉത്തമ മാർഗമാണിത്.
ഇതിലെല്ലാം ഉപരി മനശുദ്ധി ആഞ്ജനേയ ഉപാസനക്കും പ്രാർഥനക്കും അത്യന്താപേക്ഷിതമാണ്. അത്യാഗ്രഹവും ദുർവിചാരങ്ങളും പാടെ ഉപേക്ഷിച്ചു അവനവന് അർഹമായതിനു വേണ്ടി മാത്രം ആഞ്ജനേയ സ്മരണ നടത്തുക. നേർവഴിക്ക് പോകുന്നവരെ മാത്രമേ ആഞ്ജനേയ സ്വാമി അനുഗ്രഹിക്കൂ; അല്ലാത്തവരെ ചിലപ്പോൾ ശിക്ഷിച്ചെന്നു വരും.
അസാദ്ധ്യ സാധക സ്വാമി
അസാദ്ധ്യം തവ കിം വദ
രാമദൂത കൃപാ സിന്ധോ
മദ്കാര്യം സാധയ പ്രഭോ
എന്ന മന്ത്രം ജപിച്ചു മനമുരുകി പ്രാർത്ഥിച്ചാൽ ഏതു സമയത്തും ഉത്തമഭക്തന് ഹനുമാൻ സ്വാമിയുടെ അനുഗ്രഹമുണ്ടാകും എന്നത് അച്ചട്ടാണ്.
