ബരാബങ്കി: വിവാഹത്തിന് സമ്മാനങ്ങൾ നൽകുന്നത് എവിടെയും പതിവുള്ള കാര്യമാണ്. എന്നാൽ ഉത്തർപ്രദേശിനടുത്തുള്ള ബരാബങ്കി ജില്ലയിൽ വിവാഹ സമ്മാനം ഒരു 35 വയസ്സുകാരന്റെ ജീവനെടുത്തിരിക്കുകയാണ്. സ്വന്തം ഭാര്യയും കുടുംബവുമാണ് ചന്ദ്രപ്രകാശ് മിശ്രയെന്ന യുവാവിനെ മർദ്ദിച്ചു കൊന്നത്. കാരണം വേറൊന്നുമല്ല, ചന്ദ്രപ്രകാശ് സ്വന്തം സഹോദരിയുടെ വിവാഹത്തിന് നൽകിയ സമ്മാനം തന്നെ.
ഒരു സ്വർണമോതിരവും ടിവി യുമാണ് ചന്ദ്രപ്രകാശ് തന്റെ സഹോദരിക്ക് വിവാഹ സമ്മാനമായി നൽകാൻ തീരുമാനിച്ചത്. ഏപ്രിൽ 26 നായിരുന്നു സഹോദരിയുടെ വിവാഹം നിശ്ചയിച്ചിരുന്നത്. ഭർത്താവ് ടിവി യും സ്വർണ്ണമോതിരവുമാണ് സമ്മാനമായി നല്കുന്നതെന്നറിഞ്ഞ ഭാര്യ ചാബിക്ക് ഇത് സഹിക്കാവുന്നതിനപ്പുറമായിരുന്നു. ഇതിൽ പ്രകോപിതയായ ചാബി ചന്ദ്രപ്രകാശുമായി ചന്ദ്രപ്രകാശുമായി വഴക്കടിച്ചു. ഇതിന് പിന്നാലെ ഭർത്താവിനെ പാഠം പഠിപ്പിക്കാനായി സഹോദരൻമാരെ വിളിച്ചുവരുത്തുകയും ചെയ്തു.
ചാബിയുടെ സഹോദരങ്ങൾ ചന്ദ്രപ്രകാശിനെ ഒരു മണിക്കൂറോളം ക്രൂരമായി മർദ്ദിച്ചു. വിവരമറിഞ്ഞെത്തിയ ചന്ദ്രപ്രകാശിന്റെ ബന്ധുക്കൾ അവശനിലയിലായ ഇയാളെ ആശുപതിയിലെത്തിച്ചു. എന്നാൽ ചികിത്സയ്ക്കിടെ ചന്ദ്രപ്രകാശ് മരണമടയുകയായിരുന്നു. സംഭവത്തിൽ കേസ് എടുത്തതായും ചാബിയും സഹോദരങ്ങളുമുൾപ്പെടെ 5 പേർ അറസ്റ്റിലായതായും പൊലീസ് പറഞ്ഞു.
