ഹരാരെ: മുൻ സിംബാബ്വെ ക്രിക്കറ്റ് താരത്തിന് പുള്ളിപ്പുലിയുടെ ആക്രമണത്തിൽ ഗുരുതര പരിക്ക് . തൊണ്ണൂറുകളിൽ സിംബാബ്വെ ക്രിക്കറ്റിൽ നിറസാന്നിദ്ധമായിരുന്ന ഗയ് ജെയിംസ് വിറ്റാലിനാണ് പുള്ളിപ്പുലിയുടെ ആക്രമണത്തിൽ പരിക്കേറ്റത്. സിംബാബ്വെയിലെ ഹുമാനി ഭാഗത്ത് സ്വന്തം വന്യജീവി സംരക്ഷണ കേന്ദ്രത്തിൽ വളർത്തു നായയുമൊത്ത് ട്രെക്കിംഗിന് പോകുമ്പോഴായിരുന്നു ആക്രമണം. തലയ്ക്ക് സാരമായി പരിക്കേറ്റ വിറ്റാലിനെ വിമാനമാർഗ്ഗമാണ് ആശുപത്രിയിലെത്തിച്ചത്.
ചോരയിൽ കുതിർന്ന വസ്ത്രത്തിൽ വിറ്റാൽ തന്റെ വളർത്തുനായയോടൊപ്പം നിൽക്കുന്ന ചിത്രങ്ങൾ ഭാര്യ ഹന്ന സ്റ്റോക്സ് ആണ് സമൂഹമാധ്യമത്തിൽ ഷെയർ ചെയ്തത്. വിറ്റാൽ ഭാഗ്യവാനാണെന്നും വളർത്തുനായയാണ് പുലിയുടെ ഗുരുതരമായ ആക്രമണത്തിൽ നിന്ന് വിറ്റാലിനെ രക്ഷിച്ചതെന്നും ഹന്ന സ്റ്റൂക്സ് ഫേസ്ബുക്കിൽ കുറിച്ചു. സംഭവത്തിൽ വിറ്റാലിനു ഒരുപാട് രക്തം നഷടപ്പെട്ടിട്ടുണ്ടെന്നും ഒരു ശസ്ത്രക്രിയ അനിവാര്യമാണെന്നും അവർ കൂട്ടിച്ചേർത്തു.
Former Zimbabwean star all-rounder Guy Whittal survives leopard attack.
In 2021, he had a shock of his life as he spent whole night just inches away from a giant 8-foot crocodile, hiding under his bed.
Wishing legend a quick recovery 🙏.
Image & news courtesy – @crimewatchzw pic.twitter.com/f3FgUR1oOQ
— Udit (@UditKhar) April 24, 2024
51 കാരനായ വിറ്റാൽ ഇത് ആദ്യമായല്ല വന്യജീവി ആക്രമണത്തിൽ നിന്ന് തലനാരിഴയ്ക്ക് രക്ഷപ്പെടുന്നത്. 2021 ൽ വിറ്റാൽ കിടന്നുറങ്ങിയിരുന്ന കട്ടിലിനടിയിൽ നിന്ന് 8 അടി നീളമുള്ള മുതലയെ കണ്ടെടുത്ത വിവരം ആരാധകർ ഞെട്ടലോടെയാണ് കേട്ടത്.
1992 മുതൽ 2003 സിംബാബ്വെ ക്രിക്കറ്റിൽ നിറസാന്നിദ്ധ്യമായിരുന്ന വിറ്റാൽ 46 ടെസ്റ്റുകളിലായി 29.42 ബാറ്റിംഗ് ശരാശരിയിൽ ഒരു ഡബിൾ സെഞ്ച്വറി അടക്കം 2207 റൺസും, 51 വിക്കറ്റും 147 ഏകദിനങ്ങളിൽ നിന്നായി 22.54 ബാറ്റിംഗ് ശരാശരിയിൽ 2705 റൺസും 83 വിക്കറ്റും നേടിയിട്ടുണ്ട്.
